Qozog‘iston sof spirt iste’molida mintaqada birinchi o‘rinda turibdi
Markaziy Osiyo davlatlari o‘rtasida aholi jon boshiga spirtli ichimlik iste’moli bo‘yicha yangi ma’lumotlar e’lon qilindi. Bu haqda Zamin.uz xabar berdi.
Tadqiqot natijalariga ko‘ra, Qozog‘iston bu borada mintaqada birinchi o‘rinda turibdi. Xalqaro hisob-kitoblarga asoslansa, Qozog‘istonda bir yilda kishi boshiga o‘rtacha 5,4 litr sof spirt to‘g‘ri keladi.
Bu ko‘rsatkich mamlakatni nafaqat Markaziy Osiyoda yetakchi qilgan, balki jahon miqyosidagi ro‘yxatlarda ham o‘rta pog‘onalardan joy egallashiga sabab bo‘lgan. Mintaqada ikkinchi o‘rinni Qirg‘iziston egallagan.
Unda bu ko‘rsatkich yiliga kishi boshiga 3,9 litrni tashkil etadi. Turkmanistonda esa o‘rtacha 3 litr sof spirt iste’moli qayd etilgan.
O‘zbekistonda ko‘rsatkich 2,1 litr darajasida baholanmoqda. Tojikiston esa mintaqadagi eng past natijaga ega bo‘lib, u yerda aholi jon boshiga yiliga 0,7 litr spirt to‘g‘ri keladi.
Tahlilchilarning ta’kidlashicha, ba’zi musulmon davlatlarida spirtli ichimliklarni iste’mol qilish deyarli nolga yaqin darajada qolmoqda. Xususan, Quvayt, Eron, Suriya va Pokistonda eng past ko‘rsatkichlar qayd etilgan.
Jahon miqyosida Ruminiya ushbu ro‘yxatda yetakchi hisoblanadi. Ma’lumotlarga ko‘ra, u yerda 15 yoshdan katta har bir fuqaroga yiliga o‘rtacha 17,1 litr sof spirt to‘g‘ri keladi.
Mutaxassislar bunday ko‘rsatkichlar aholining turmush tarzi, madaniy muhit va sog‘lom hayotga e’tiborini baholashda muhim ahamiyatga ega ekanini ta’kidlamoqda.
