Avgustda bir vaqtning o'zida bir nechta noyob koinot hodisalari kuzatiladi
Joriy yilning 12-avgust kuni koinot ixlosmandlari uchun bir vaqtning o'zida bir nechta noyob astronomik hodisalar sodir bo'lishi kutilmoqda. Bu haqda One.uz xabar beradi.
Shu kuni Yer aholisi Quyosh tutilishi, Perseid meteorlar oqimining eng yuqori nuqtasi, Venera sayyorasining o'ziga xos fazasi hamda Somon yo'lining favqulodda yorqin ko'rinishiga guvoh bo'lishadi. Bu kabi bir qator koinot hodisalarining bir kunga to'g'ri kelishi astronomiya tarixidagi eng qiziqarli va kamyob voqealardan biri sifatida baholanmoqda.
Xalqaro nashrlarning ma'lum qilishicha, kunduzi Oy Quyosh diskining bir qismini to'sib qo'yishi natijasida tutilish yuz beradi. To'liq Quyosh tutilishi asosan Grenlandiyaning sharqi, Islandiyaning g'arbiy hududlari va Ispaniyaning shimoliy qismida kuzatiladi.
Shu bilan birga, Shimoliy Amerika, Yevropa va Shimoliy Afrika hududlarida istiqomat qiluvchi qariyb 779 million kishi ushbu tabiat hodisasini qisman bo'lsa-da tomosha qilish imkoniga ega bo'ladi. Quyosh tutilishi va sayyoralar harakati Mutaxassislarning ta'kidlashicha, Shimoliy Amerikadagi eng sezilarli qisman tutilish Kanadaning Nunavut hududida qayd etiladi.
Bu yerda Quyosh yuzasining 93 foizigacha bo'lgan qismi Oy soyasida qoladi. Amerika Qo'shma Shtatlarida esa ushbu manzarani Alyaska va mamlakatning shimoli-sharqiy shtatlari aholisi boshqalarga qaraganda aniqroq ko'rishlari mumkin.
Quyosh botganidan so'ng osmon kengliklarida yana bir qiziqarli holat kuzatiladi. Venera sayyorasi astronomiyada dixotomiya deb ataladigan holatga kiradi.
Bunda sayyora teleskop yoki kuchli durbin orqali qaralganda xuddi yarim oy shaklida namoyon bo'ladi. Ushbu holat sayyoralarni kuzatishni xush ko'ruvchi havaskorlar uchun ayni muddaodir.
Meteorlar yomg'iri va Somon yo'li Tun yarmiga yaqinlashganda yilning eng mashhur meteorlar oqimi hisoblangan Perseidlar yomg'iri o'zining eng faol bosqichiga chiqadi. Joriy yilda ushbu davr Yangi oy fazasiga to'g'ri kelgani sababli, tungi osmon oy nuri bilan yoritilmaydi.
Bu esa "uchar yulduzlar"ni kuzatish uchun ideal sharoit yaratadi. Qulay ob-havo sharoitida har soatda 50 tadan 75 tagacha meteorning yonib o'tishini ko'rish mumkin bo'ladi.
Astronomlar meteorlarni kuzatish uchun eng maqbul vaqt mahalliy vaqt bilan tungi soat 00:00 dan 02:00 gacha ekanini tavsiya qilmoqdalar. Ayniqsa, shahar chiroqlaridan uzoqda bo'lgan qishloq joylarda va havo toza hududlarda Somon yo'li galaktikasi yil davomidagi eng ravshan ko'rinishida namoyon bo'ladi.
Bir sutka ichida to'rtta yirik astronomik hodisaning jamlanishi 12-avgust sanasini unutilmas kunga aylantirishi shubhasiz.
