AQSHda iyul oyi oxirgi 130 yildagi eng issiq davr bo'ldi
Amerika Qo‘shma Shtatlarining quyi 48 shtatida 2026-yilning iyul oyi meteorologik kuzatuvlar tarixidagi eng issiq davr sifatida qayd etildi. Bu haqda One.uz xabar beradi.
Ushbu oyda o‘rtacha havo harorati 24,94 daraja Selsiyni tashkil etib, 1936-yilning iyulida o‘rnatilgan avvalgi rekord ko‘rsatkichni yangiladi. Mamlakatda ob-havo ma’lumotlari 1895-yildan buyon tizimli ravishda yuritib kelinayotgan bo‘lsa, joriy yilgi ko‘rsatkichlar so‘nggi 130 yildan ortiq vaqt mobaynidagi eng yuqori natija bo‘ldi.
Associated Press axborot agentligi tarqatgan ma’lumotlarga ko‘ra, anomal issiq havo deyarli barcha hududlarni qamrab olgan. Ma’lumotlarga ko‘ra, iyul oyida quyi 48 shtat hududidagi o‘rtacha harorat Farengeyt shkalasi bo‘yicha 76,89 darajaga yetgan.
E’tiborli jihati shundaki, Alyaska shtatida ob-havo odatdagidan biroz salqinroq kelgan bo‘lsa-da, qolgan barcha hududlarda harorat me’yordan sezilarli darajada yuqori bo‘lgan. Ayniqsa, Tog‘li G‘arb, Janubi-g‘arbiy, Shimoliy tekisliklar va Janubi-sharqiy mintaqalarda jazirama issiq o‘zining eng yuqori nuqtasiga chiqqan.
Har bir shtatda qayd etilgan o‘rtacha ko‘rsatkichlar o‘tgan asrdagi o‘rtacha haroratdan kamida 0,6 daraja Selsiyga baland ekani kuzatilgan. Tungi haroratning yuqoriligi va iqlim o‘zgarishi Mutaxassislarning ta’kidlashicha, ushbu rekord natijaning asosiy sabablaridan biri faqatgina kunduzgi jazirama emas, balki tungi haroratning ham pasaymaganidir.
Iyul oyida tungi vaqtdagi eng past harorat ko‘rsatkichlari bo‘yicha ham yangi rekordlar o‘rnatildi. Bu holat inson salomatligi va atrof-muhit uchun jiddiy xavf tug‘diradi, chunki havo tunda ham sovumagani sababli ekotizim va odamlar jaziramadan dam olish imkoniga ega bo‘lmaydi.
Yel universiteti iqlimshunosi Jeff Mastersning so‘zlariga ko‘ra, 2026-yilning iyulidagi issiqlik hatto 1930-yillardagi mashhur Chang bo‘ronlari davrida qayd etilgan rekordlardan ham o‘zib ketgan. Mutaxassislar ushbu holatni global iqlim o‘zgarishining yaqqol oqibati sifatida baholamoqda.
Rekord darajadagi issiqlik AQSHda iqlimdagi uzoq muddatli o‘zgarishlar tobora jiddiy tus olayotganini va kelajakda bunday tabiiy hodisalar tez-tez takrorlanishi mumkinligini ko‘rsatmoqda.
