Rossiya zarbalari natijasida Ukrainada gaz qazib olish infratuzilmasi shikastlandi

Ukrainaning energetika tizimida vaziyat keskinlashib bormoqda. Bu haqda One.uz xabar beradi.

Mamlakatning eng yirik energetika korxonasi hisoblangan Naftogaz guruhi so‘nggi bir hafta ichida o‘z tasarrufidagi obyektlarga Rossiya tomonidan 13 marotaba dron va raketa zarbalari berilganini rasman tasdiqladi. Milliy kompaniya ma’lumotlariga ko‘ra, strategik ahamiyatga ega bo‘lgan aktivlarga bir necha bor takroriy hujumlar uyushtirilgan bo‘lib, asosiy zararlar gaz qazib olish infratuzilmasiga yetkazilgan.

Ushbu hujumlar natijasida texnik uskunalar ishdan chiqqan va yoqilg‘i qazib olish hajmi sezilarli darajada kamaygan. Ishlab chiqarish quvvatlaridagi yo‘qotishlar Naftogaz matbuot xizmati infratuzilmaning shikastlanish darajasi va yuzaga kelgan uzilishlar bo‘yicha aniq ma’lumotlarni taqdim etdi.

Qayd etilishicha, ishlab chiqarish quvvatlarida jiddiy buzilishlar yuzaga kelgan bo‘lib, ayrim obyektlarning faoliyati xavfsizlik nuqtayi nazaridan vaqtincha to‘xtatib qo‘yilgan. Rasmiy hisobotlarga tayanadigan bo‘lsak, joriy yil boshidan buyon kompaniya obyektlariga jami 293 marotaba hujum uyushtirilgan.

Bu esa soha barqarorligiga jiddiy tahdid solmoqda. Zarbalar to‘lqinidan avval Ukrainada kunlik gaz qazib olish ko‘rsatkichi o‘rtacha 50 million kub metrni tashkil etayotgan edi.

Hukumat vakillari infratuzilmaga yetkazilgan shikastlanishlar tufayli umumiy ishlab chiqarish hajmi 30 foizdan 60 foizgacha qisqarishi mumkinligidan xavotir bildirmoqda. Bunday pasayish mamlakatning ichki ehtiyojlarini qondirishda qiyinchiliklar tug‘dirishi ehtimoldan yiroq emas.

Gaz zaxiralari va tayyorgarlik holati Shunga qaramay, Yevropa statistika ma’lumotlari Ukrainaning yer osti omborlariga gaz haydash jarayoni davom etayotganini ko‘rsatmoqda. Yoz oylarida kunlik gaz haydash hajmi taxminan 40 million kub metr atrofida saqlanib qoldi.

Avgust oyi o‘rtalaridagi holatga ko‘ra, mamlakatdagi yer osti gaz omborlarida 14,2 milliard kub metr zaxira to‘plangan. Bu ko‘rsatkich hukumat tomonidan bo‘lajak isitish mavsumi uchun belgilangan rejaga juda yaqin hisoblanadi.

E’tiborli jihati shundaki, Ukraina aprel oyidan buyon deyarli gaz import qilmadi. So‘nggi to‘rt yarim oy ichida xorijdan atigi 100 million kub metr yoqilg‘i sotib olingan.

Mutaxassislar ushbu holatni xususiy kompaniyalar tomonidan qazib olish hajmining ortishi yoki ichki iste’molning kamaygani bilan izohlamoqda. Energetika sohasidagi vaziyat murakkabligicha qolayotgan bo‘lsa-da, soha xodimlari tizimni qayta tiklash va qishki mavsumga tayyorgarlik ko‘rish ishlarini davom ettirmoqda.