Botsvanada topilgan dunyodagi ikkinchi eng yirik olmos sotildi
Botsvanadagi Karove konidan topilgan, og‘irligi 2 488,32 karat bo‘lgan dunyodagi eng yirik olmoslardan biri hisoblangan Motsvedi nihoyat o‘z xaridorini topdi. Bu haqda One.uz xabar beradi.
Mazkur noyob tosh insoniyat tarixida topilgan ikkinchi eng yirik zargarlik olmosi sifatida e’tirof etilgan bo‘lib, u Kanadaning Lucara Diamond konchilik kompaniyasi tomonidan sotilgan. Garchi olmosning aniq narxi va xaridorning shaxsi sir tutilayotgan bo‘lsa-da, ushbu kelashuv zargarlik olami uchun yilning eng muhim voqealaridan biriga aylandi.
Motsvedi olmosi ilk bor 2024-yilning avgust oyida jamoatchilikka e’lon qilingan edi. Dastlabki o‘lchovlarda uning og‘irligi 2 492 karat deb ko‘rsatilgan bo‘lsa, keyinchalik tozalash va ishlov berish jarayonlaridan so‘ng aniq vazni 2 488,32 karat ekani tasdiqlandi.
Amerika Gemologiya instituti mutaxassislari ushbu topilmani o‘rganib chiqib, uni sifat jihatidan juda yuqori baholadilar. Tarixiy ahamiyatga ega topilma Ushbu ulkan tosh o‘zining kattaligi bo‘yicha faqatgina 1905-yilda Janubiy Afrika Respublikasida topilgan mashhur Kullinan olmosidan ortda qoladi.
Eslatib o‘tamiz, Kullinanning og‘irligi 3 106 karatni tashkil etgan. Motsvedi esa o‘zining shaffofligi va och jigarrang tusi bilan ajralib turadi.
Mutaxassislar uni kam nuqsonli va yaxlit kristall tuzilishiga ega noyob namuna sifatida qayd etishgan. Lucara Diamond kompaniyasi o‘zining 2026-yil ikkinchi choragi yakunlari bo‘yicha hisobotida ushbu olmos sotilganini ma’lum qildi.
Kompaniyaning ushbu davrdagi umumiy daromadi 41 million dollarni tashkil etgan bo‘lsa, Motsvedining sotuvidan tushgan mablag‘ ham aynan shu ko‘rsatkichlar tarkibiga kiritilgan. Biroq, shartnoma shartlariga ko‘ra, yakuniy narx ochiqlanmagan.
Noyob toshlarni sotishdagi qiyinchiliklar Bunday ulkan hajmdagi qimmatbaho toshlarni sotish jarayoni o‘ziga xos murakkabliklarga ega. Bozor qoidalariga ko‘ra, bu darajadagi noyob buyumlarning aniq qiymatini belgilash uchun umumiy mezonlar mavjud emas.
Shu sababli, har bir bunday kelashuv alohida muzokaralar va ekspertiza asosida amalga oshiriladi. Kelajakda ushbu olmosning taqdiri qanday bo‘lishi hozircha noma’lum.
Yangi egasi uni butunligicha saqlab qolib, muzey eksponati sifatida foydalanishi yoki bir nechta kichikroq, ammo o‘ta qimmatbaho zargarlik buyumlariga bo‘lib yuborishi mumkin. Qanday qaror qabul qilinishidan qat’i nazar, Motsvedi olmosi zargarlik sanoati tarixida o‘chmas iz qoldirdi.
