«Flydubai» uchuvchisi havoda kapitanga bolta bilan hujum qildi
2026-yil 30-sentabr kuni Dubaydan Tel-Aviv shahriga parvoz qilayotgan Flydubai aviakompaniyasining FZ1073 reysida favqulodda holat yuz berdi. Bu haqda One.uz xabar beradi.
Samolyot havoda bo‘lgan vaqtda ikkinchi uchuvchi havo kemasi kapitani, hindistonlik Smit Machchxarga hujum qilib, unga tan jarohati yetkazdi. Samolyot bortida 174 nafar yo‘lovchi bo‘lib, janjal oqibatida havo kemasi boshqaruvni yo‘qotib, keskin pasaya boshlagan.
Ekipaj a’zolari va yo‘lovchilarning faol harakati hamda boshqa uchuvchilarning aralashuvi natijasida samolyot Saudiya Arabistonining Tabuk shahridagi aeroportga xavfsiz qo‘ndirildi. Birlashgan Arab Amirliklari bosh prokuraturasining ma’lum qilishicha, hujum vaqtida samolyotdagi favqulodda vaziyatlar uchun mo‘ljallangan boltadan foydalanilgan.
Hodisa taxminan 10 ming metr balandlikda sodir bo‘lgan va o‘sha paytda samolyot qisqa soniyalar ichida 5 ming metr balandlikkacha sho‘ng‘igan. Jarohatlangan kapitan Machchxar katta qiyinchilik bilan kabina eshigini ochishga muvaffaq bo‘lgan va yordam chaqirgan.
Shundan so‘ng yo‘lovchilar va styuardessalar hujum qilgan shaxsni to‘xtatib, uni zararsizlantirishgan. Xavfsizlik choralari va qahramonlik Havo kemasi havoda bo‘lganida dastlab umumiy xavfni bildiruvchi 7700 signalini, keyinroq esa samolyotni olib qochish yoki noqonuniy aralashuvni anglatuvchi 7500 maxsus kodini yuborgan.
Bu holat xalqaro aviatsiya xizmatlarini oyoqqa turg‘azdi. Samolyotni Saudiya Arabistoniga qo‘ndirishda bortdagi boshqa zaxira uchuvchilarning mahorati qo‘l keldi.
Ular vaziyatni to‘liq nazoratga olib, yo‘lovchilar hayotini saqlab qolishdi. Isroil hukumati rahbari Binyamin Netanyaxu ushbu voqeaga munosabat bildirib, kapitan Smit Machchxarning jasoratini alohida e’tirof etdi.
Uning so‘zlariga ko‘ra, uchuvchi og‘ir jarohat olganiga qaramay, o‘zini yo‘qotib qo‘ymagan va o‘nlab insonlar hayotini halokatdan asrab qolgan. Hozirda mazkur holat yuzasidan xalqaro darajada tergov harakatlari olib borilmoqda.
Flydubai aviakompaniyasi rahbariyati ham voqea tafsilotlarini sinchiklab o‘rganayotganini ma’lum qildi. Hujum qilgan uchuvchining bunday harakatga qo‘l urishiga nima sabab bo‘lgani va uning ruhiy holati mutaxassislar tomonidan tekshirilmoqda.
Hozircha hodisaning terrorizmga aloqadorligi yoki shaxsiy adovat ekani haqida rasmiy xulosalar berilmadi.
