Hindistonda odam savdosi qurboniga aylangan O'zbekiston fuqarosi qutqarildi
Hindistonning Haydarobod shahrida huquq-tartibot idoralari tomonidan o‘tkazilgan maxsus reyd davomida odam savdosi bilan bog‘liq noqonuniy tarmoq fosh etildi. Bu haqda One.uz xabar beradi.
Dastlabki xabarlarda qutqarilgan ayollarning barchasi O‘zbekiston fuqarolari ekani aytilgan bo‘lsa-da, keyinchalik olib borilgan surishtiruvlar natijasida ular orasida faqat bir nafar hamyurtimiz borligi aniqlandi. Hozirda mazkur fuqaroning huquqlarini himoya qilish va uni vatanga qaytarish bo‘yicha zarur choralar ko‘rilmoqda.
Mahalliy politsiyaning odam savdosiga qarshi kurash bo‘linmasi shahardagi mehmonxonalardan birida tezkor tadbir o‘tkazdi. Ushbu amaliyot davomida noqonuniy faoliyatni tashkil etishda gumonlangan ikki nafar shaxs qo‘lga olindi.
Aniqlanishicha, Rammoxan Reddi va Nixil ismli ushbu shaxslar mehmonxonadan maxsus xonalar ijaraga olib, turli hududlardan mijozlarni jalb qilish bilan shug‘ullanib kelgan. Diplomatik ko‘mak va tergov jarayoni O‘zbekistonning Hindistondagi elchixonasi mazkur holat yuzasidan zudlik bilan Haydarobod politsiyasi bilan aloqa o‘rnatdi.
O‘tkazilgan tekshiruvlar natijasida jabrlanganlar orasida faqat bir nafar O‘zbekiston fuqarosi borligi rasman tasdiqlandi. Qolgan ayollar boshqa mamlakatlardan ekani ma’lum bo‘ldi.
Bu ma’lumot dastlabki noto‘g‘ri xabarlarga aniqlik kiritish imkonini berdi. Hozirda jabrlangan hamyurtimiz Haydarobodning Kukatpalli tumanidagi ixtisoslashtirilgan ijtimoiy xizmatlar muassasasiga joylashtirilgan.
Unga zaruriy psixologik va huquqiy yordam ko‘rsatilmoqda. Diplomatlar ayolni qisqa muddat ichida O‘zbekistonga qaytarish uchun mahalliy hokimiyat organlari bilan hujjatlashtirish ishlarini olib bormoqda.
Mazkur holat yuzasidan Hindiston jinoyat kodeksining tegishli moddalari bilan ish qo‘zg‘atilgan. Politsiya ushbu jinoiy tarmoqning boshqa a’zolarini aniqlash va noqonuniy faoliyat ko‘lamini o‘rganish maqsadida tergov harakatlarini davom ettirmoqda.
O‘zbekiston Tashqi ishlar vazirligi va elchixona vaziyatni to‘liq nazoratga olgan.
