Kyivda razvedka zobiti va josuslar yo‘q qilindi
Ukraina xavfsizlik xizmati (SBU) ma’lumotlariga ko‘ra, Kyivda yuqori martabali razvedka zobiti o‘ldirilganidan so‘ng, Rossiya xavfsizlik xizmatiga (FSB) aloqador ikki agent ham yo‘q qilingan. Bu haqida Zamin.uz xabar berdi.
Bu haqda BBC xabar berdi. SBU rahbari Vasyl Malyuk videomurojaatida Rossiya foydasiga josuslik qilgan ikki shaxs “qamoqqa olinayotganda qarshilik ko‘rsatgani” sababli yo‘q qilinganini ma’lum qildi.
10 iyul kuni Ukraina razvedkasi polkovnigi Ivan Voronich poytaxt Kyivda otib o‘ldirilgan. Voqea ertalab soat 09:00 atrofida Kyivning janubiy Holosiyivskiy tumanida sodir bo‘lgan.
CCTV kameralaridagi kadrlar shuni ko‘rsatadiki, Voronich binodan chiqib ketayotganida unga qarab yugurayotgan noma’lum shaxs mavjud bo‘lgan. SBU ma’lumotiga ko‘ra, gumonlanuvchilar Voronichning harakatlarini oldindan kuzatgan va unga suiqasd uyushtirish uchun maxsus to‘pponchani yashirin joydan olishgan.
O‘ldirilgach, jinoyatchilar yashirinishga harakat qilgan, biroq SBU va milliy politsiya olib borgan qo‘shma tergov natijasida ular aniqlangan va zararsizlantirilgan. Ukraina milliy politsiyasi o‘ldirilgan shaxslar xorij fuqarolari ekanini bildirgan, ammo batafsil ma’lumot bermagan.
Rossiya rasmiylari hozircha bu masalaga izoh bermadi. SBU asosan ichki xavfsizlik va qarshi razvedka ishlariga mas’ul bo‘lsa-da, 2022-yildan boshlab Rossiyaga qarshi sabotaj va maxfiy operatsiyalarda faol ishtirok etmoqda.
2024-yil dekabrida Rossiyaning yuqori lavozimli generali Igor Kirillovning o‘limi ham SBU operatsiyasi natijasi deb hisoblanadi. 2025-yil aprelida Moskvada yuz bergan portlashda halok bo‘lgan general Yaroslav Moskalik hujumi uchun esa Moskva Kiyevni ayblagan.
Shunga qaramay, Ukraina bu operatsiyalar uchun rasmiy javobgarlikni o‘z zimmasiga olmadi. Ushbu hodisalar Rossiyaning Ukrainaga qarshi havo hujumlari soni keskin oshgan davrga to‘g‘ri kelmoqda.
Ukraina prezidenti Volodimir Zelenskiy mamlakat Rossiyadan eng yirik havo hujumiga duch kelganini aytdi. Birlashgan Millatlar Tashkilotiga ko‘ra, iyun oyida Ukraina so‘nggi uch yildagi eng ko‘p tinch aholi talofatlarini qayd etdi.
Uzoq davom etayotgan urushda o‘t ochishni to‘xtatish bo‘yicha muzokaralar hozircha samara bermagan.
