Turkiya vaziri G‘azoda Isroilni genotsidda aybladi
Birlashgan Millatlar Tashkiloti Xavfsizlik Kengashining G‘azodagi gumanitar vaziyat bo‘yicha favqulodda yig‘ilishida Turkiya Tashqi ishlar vaziri Hoqon Fidan muhim bayonot bilan chiqdi. Bu haqida Zamin.uz xabar berdi.
U Isroilning Falastin xalqiga qarshi amalga oshirayotgan harakatlarini to‘xtovsiz genotsid deb atab, xalqaro hamjamiyatni bunga befarqlik bilan qarashda aybladi. Vazir nutqida Isroil tinchlikni istamayotgani va mintaqada barqarorlikni ta’minlamoqchi emasligini ta’kidladi.
Hoqon Fidan G‘azo sektoridagi ikki milliondan ortiq aholining og‘ir sharoitda yashayotganini aytdi. Ular ommaviy ko‘chish, ochlik, suvsizlik va doimiy havo hujumlari sababidan og‘ir qiynalmoqda.
Isroil har kuni insonparvarlik yordamini ataylab to‘sib, faqat gumanitar tashkilotlar tomonidan amalga oshirilayotgan oziq-ovqat va suv yetkazib berish nuqtalarida fuqarolarga zarar yetkazmoqda. Bolalar suv olishga, onalar esa farzandlari uchun ovqat topishga urinish paytida halok bo‘lmoqda.
Vazir ochlik bugungi kunda urush quroli sifatida ishlatilayotganini, xalqaro gumanitar huquq me’yorlari esa buzilayotganini ta’kidladi. U dunyo konslagerlarning qayta paydo bo‘lishiga guvoh bo‘layotganini, Falastin esa butunlay qirg‘inga uchrayotganini bildirdi.
Shuningdek, Isroilning urush mashinasi nafrat va jazosizlik asosida ba’zi kuchlar tomonidan qo‘llab-quvvatlanayotganini qayd etdi. Hoqon Fidan genotsid haqida gapirishdan chekinish insoniylikka zid ekanligini, G‘azodagi fojialarni to‘xtatish uchun jahon hamjamiyati tomonidan qat’iy choralar ko‘rilishi zarurligini ta’kidladi.
Bu faqat G‘azo emas, balki butun insoniyat uchun sinov ekanligini bildirdi. Hozirda e’tibor BMT Xavfsizlik Kengashiga qaratilgan bo‘lib, ushbu bayonotlarning amaliy natijasi vaqt o‘tishi bilan ko‘rinadi.
