O‘zbekiston oltin zaxiralari qiymati rekord darajaga yetdi
2026 yilning 1 mart holatiga ko‘ra, O‘zbekiston oltin zaxiralari qiymati 67,7 milliard dollarga yetdi. Bu haqda Zamin.uz xabar berdi.
Bu ko‘rsatkich yil boshidagi 55,1 milliard dollarga nisbatan sezilarli darajada oshgan. Markaziy bankning ma’lumotlariga ko‘ra, shu davrda jismoniy oltin hajmi 12,6 million troy unsiyadan 13,1 million troy unsiyaga ko‘tarildi.
Xalqaro bozor narxlarining o‘sishi esa zaxiralar qiymatini yanada oshirishga sabab bo‘ldi. Regulyator ta’kidlaganidek, oltin iqtisodiy beqarorlik va geosiyosiy xavf davrida strategik, ishonchli va xavfsiz aktiv sifatida xizmat qiladi.
Oltin yuqori likvidga ega bo‘lib, kredit yoki qarzdorlik xatariga duch kelmaydi. Shuningdek, u inflyatsiya va valyuta qadrsizlanishiga nisbatan tabiiy himoya vositasi hisoblanadi.
Ma’lumot uchun, troy unsiya qimmatbaho metallar – oltin, kumush, platina va palladiy – uchun standart o‘lchovdir. U 31,1035 grammga teng bo‘lib, bank ishlarida, zargarlik buyumlari va fond birjalarida keng qo‘llaniladi.
