yildan ko‘chmas mulk va avtomobil savdosi faqat naqdsiz bo‘ladi
O‘zbekistonda 2026 yil 1 apreldan boshlab ko‘chmas mulk va avtomobillar savdosi faqat naqdsiz to‘lov shaklida amalga oshiriladi. Bu haqda Zamin.uz xabar berdi.
Iqtisodiyot va moliya vaziri o‘rinbosari Ahadbek Haydarovning ma’lum qilishicha, bu o‘zgarish yillik 60-100 trillion so‘m miqdoridagi mablag‘ni bank tizimiga jalb etishga imkon beradi. Natijada, kredit bozorida raqobat kuchayib, foiz stavkalari pasayishi kutilmoqda.
Haydarovning so‘zlariga ko‘ra, agar bitta avtomobil narxi 200 million so‘m deb olinsa va kuniga 100 ta avtomobil sotilsa, bu bank tizimiga 20 milliard so‘m tushadi. Agar sotuvlar soni 1000 taga yetadigan bo‘lsa, mablag‘ 200 milliard so‘mga yetadi.
Bu ko‘rsatkichlar yillik hisobda yanada oshadi va banklar uchun arzon kredit resurslari paydo bo‘ladi. Shuningdek, bu jarayon banklar o‘rtasida qat’iy raqobatni yuzaga keltiradi.
Banklar mijozlarni jalb qilish maqsadida xizmatlar sifatini yaxshilashga va shartlarni yengillashtirishga majbur bo‘ladi. Agar kuniga 20 milliard so‘m bank hisobida aylanib yursa, bu mablag‘lar kreditlarga yo‘naltiriladi va shu orqali kredit resurslari arzonlashadi.
Adliya vaziri o‘rinbosari Muzraf Ikromovning ma’lumot berishicha, O‘zbekistonda yil davomida taxminan 5,4 million notarial harakatlar amalga oshiriladi. Shundan 320 mingdan ortig‘i ko‘chmas mulkka, 650 mingga yaqini esa avtomobil oldi-sotdisiga to‘g‘ri keladi.
Eslatib o‘tamiz, 2026 yil 1 apreldan boshlab O‘zbekistonda yoqilg‘i, alkogol va tamaki mahsulotlari, kommunal va davlat xizmatlari, shuningdek ko‘chmas mulk va 10 yoshdan kichik avtomobillar faqat naqdsiz to‘lov orqali sotiladi. Bundan tashqari, narxi 25 million so‘mdan yuqori har qanday tovar va xizmat faqat naqdsiz usulda xarid qilinishi mumkin.
Mazkur chora bank tizimida likvidlikni oshirish bilan birga, aholi va tadbirkorlar uchun qulay shart-sharoitlar yaratadi. Bu esa iqtisodiyotning raqobatbardosh va barqaror rivojlanishiga xizmat qiladi.
