O‘zbekiston 15 turdagi xomashyoga bojlarni bekor qiladi
O‘zbekistonda 15 turdagi mahsulotni ishlab chiqarishda zarur bo‘lgan xomashyolarga bojlar bekor qilinishi rejalashtirilmoqda. Bu haqda Zamin.uz xabar berdi.
Bu haqda tadbirkorlar bilan ochiq muloqotda Bosh vazir o‘rinbosari Jamshid Xo‘jayev ma’lum qildi. Uning so‘zlariga ko‘ra, ayrim sohalarda “tarif inverziya” holati kuzatilmoqda.
Ya’ni, tayyor mahsulotlarni import qilish arzonroq bo‘lsa-da, ularni ichki ishlab chiqarish uchun kerakli xomashyoga yuqori bojlar qo‘yilmoqda. Natijada mahalliy ishlab chiqaruvchilar qo‘shimcha xarajatlarni o‘z zimmasiga oladi va raqobatbardoshlik darajasi pasayadi.
Shu sababli ba’zi korxonalar o‘z quvvatida to‘liq mahsulot ishlab chiqarolmayapti. Tahlillar asosida quyidagi mahsulotlar uchun xomashyo importida bojlarni bekor qilish tajriba tariqasida taklif qilinmoqda: elektr skuterlari, nogironlik aravachalari, kungaboqar yog‘i, marmeladlar, karamel shirinliklar, shokolad, bolalar oziq-ovqati, tez tayyorlanadigan unli mahsulotlar, pryanik va pechenelar, vaflilar, piroglar, kekslar, jem va murabbolar, konservalangan qulupnay hamda shakarli ichimliklar.
Shuningdek, qandolat mahsulotlari misolida hozirda shokolad va boshqa shirinliklarni import qilish ichki ishlab chiqarishdan arzonroq ekanligi qayd etildi. Bu holat mahalliy ishlab chiqaruvchilarning raqobatbardoshligini pasaytirishi sababli, bojlarni bekor qilish orqali ularni qo‘llab-quvvatlash maqsad qilingan.
