Yevropa Markaziy banki raqamli valyutalar xavfidan jiddiy ogohlantirdi
Yevropa Markaziy banki Yevropa Ittifoqi moliya vazirlarini raqamli valyutalar, xususan, yevroga boglangan steyblkoinlar emissiyasini kengaytirish borasidagi takliflar borasida jiddiy ogohlantirdi. Bu haqda Zamin.uz xabar berdi.
Bank mutasaddilarining fikricha, bunday tashabbuslar amaldagi bank kreditlash tizimini zaiflashtirishi va pul-kredit siyosatini yuritishni sezilarli darajada murakkablashtirishi mumkin. Reuters axborot agentligi tarqatgan ma’lumotlarga ko‘ra, ushbu e’tirozlar Nikosiya shahrida o‘tkazilgan Iqtisodiy va moliyaviy masalalar kengashining norasmiy yig‘ilishida bildirilgan.
Mazkur yig‘ilishda Bruegel tahliliy markazi tomonidan tayyorlangan maxsus hisobot muhokama qilingan edi. Bruegel tahlilchilari yevro steyblkoin bozorini rivojlantirish va dollar bilan bog‘langan raqobatchilarga yetib olish uchun emitentlarga qo‘yiladigan likvidlik talablarini yumshatishni taklif etishgan.
Shuningdek, ular ushbu kompaniyalarga Yevropa Markaziy banki mablag‘laridan foydalanish imkoniyatini berish g‘oyasini ilgari surdilar. Hozirgi vaqtda dunyo bo‘ylab amalga oshirilayotgan steyblkoin tranzaksiyalarining qariyb o‘ttiz sakkiz foizi yevropaliklar hissasiga to‘g‘ri kelsa-da, yevro nominalidagi tokenlar umumiy bozorning atigi bir foizidan kamrog‘ini tashkil etadi.
Hozirda eng yirik yevro steybloini hisoblangan EURC global reytingda bor-yo‘g‘i o‘n ikkinchi o‘rinda bormoqda. Yevropa Markaziy banki prezidenti Kristin Lagard ushbu takliflarga qat’iy qarshi chiqdi.
Uning ta’kidlashicha, steyblkoinlar emissiyasining nazoratsiz ko‘payishi banklardagi omonatlar hajmini kamaytirib, tijorat banklarining moliyalashtirish xarajatlarini oshirib yuboradi. Bu jarayon esa markaziy bankning foiz stavkalarini samarali boshqarish va iqtisodiyotni tartibga solish qobiliyatiga putur yetkazishi mumkin.
Yig‘ilish ishtirokchilari, shuningdek, faqat tartibga solinadigan an’anaviy banklar uchun mo‘ljallangan imtiyozlarni xususiy steyblkoin kompaniyalariga berish g‘oyasini shubha ostiga oldilar. Kristin Lagard xususiy steyblkoinlar o‘rniga markaziy bank tomonidan kafolatlangan va tokenlashtirilgan moliyaviy infratuzilmani rivojlantirish maqsadga muvofiq ekanini bildirdi.
U yirik hisob-kitoblar uchun maxsus loyihalarni va yangi yo‘l xaritalarini amalga oshirishni afzal ko‘rmoqda. Tahlilchilar AQSHga nisbatan qat’iyroq qoidalar raqamli dollarizatsiyani tezlashtirishi mumkinligidan xavotir bildirgan bo‘lsalar-da, Yevropa Markaziy banki rasmiylari bu xavotirlarni rad etdilar.
Aksincha, ular moliyaviy barqarorlikni saqlash va rezervlarning keskin chiqib ketishidan himoyalanish uchun qat’iy cheklovlar o‘rnatish zarurligini ta’kidladilar.
