O'zbekiston va Pokiston Xitoy orqali yangi transport yo'lagini ochadi

O‘zbekiston va Pokiston hukumatlari Afg‘onistondagi beqaror vaziyat hamda chegaralarning yopilishi sababli yuk tashish uchun Xitoy hududi orqali o‘tadigan yangi transport yo‘lagini rasman joriy etishga kelishib oldi. Bu haqda One.uz xabar beradi.

Mintaqaviy xavfsizlik va geosiyosiy o‘zgarishlar fonida ishlab chiqilgan ushbu muqobil yo‘nalish Markaziy va Janubiy Osiyo o‘rtasidagi savdo aloqalarini uzluksiz ta’minlashga xizmat qiladi. O‘zbekiston Bosh vaziri o‘rinbosarining Islomobodga tashrifi doirasida ushbu yo‘nalishni rasmiy maqomga ega transport yo‘lagiga aylantiruvchi muhim hujjat imzolanishi kutilmoqda.

Ananaviy yo‘nalishlardagi muammolar Ilgari Afg‘oniston orqali o‘tadigan marshrut eng qisqa va moliyaviy jihatdan eng tejamkor yo‘nalish hisoblanar edi. Hatto O‘zbekiston, Afg‘oniston va Pokistonni bog‘lovchi transafg‘on temir yo‘li loyihasi mintaqa iqtisodiyotining asosi sifatida ko‘rilayotgan edi.

Biroq Islomobod va Kobul o‘rtasidagi munosabatlarning keskinlashuvi oqibatida Torxam va Chaman chegara o‘tish punktlari yopildi. Bu holat mazkur yo‘nalishning amalda o‘z faoliyatini to‘xtatishiga olib keldi.

Shu bilan birga, tomonlar Eron hududi orqali o‘tadigan muqobil yo‘llarni ham atroflicha ko‘rib chiqishdi. Ammo Eron atrofidagi harbiy va siyosiy keskinlikning ortib borishi ushbu variantning xavfsizlik darajasini pasaytirib, uning iqtisodiy jozibadorligiga salbiy ta’sir ko‘rsatdi.

Natijada xavfsiz va barqaror yo‘nalish sifatida Xitoy varianti tanlab olindi. Yangi logistika tizimining ishlash tartibi Xitoy orqali o‘tadigan yo‘nalish masofa jihatidan uzunroq va transport xarajatlari yuqoriroq bo‘lishiga qaramay, eng ishonchli yo‘l deb topildi.

Yangi sxemaga ko‘ra, Pokiston tovarlari Xitoy bilan chegaradagi Sost quruq porti orqali olib o‘tiladi. Shundan so‘ng yuklar Xitoyning g‘arbiy hududlari orqali tranzit tarzida o‘tib, Markaziy Osiyo mamlakatlariga, xususan, O‘zbekistonga kirib keladi.

Ushbu logistika zanjiri Pokiston uchun Markaziy Osiyo bozorlariga barqaror chiqish imkonini bersa, O‘zbekiston uchun Pokiston dengiz portlari bilan uzluksiz aloqani saqlab qolish kafolatini beradi. Bugungi kunda Pokiston O‘zbekistonning Janubiy Osiyodagi ikkinchi yirik savdo hamkori hisoblanadi.

Yangi transport yo‘lagining ishga tushirilishi ikki mamlakat o‘rtasidagi tovar ayirboshlash hajmini kamaytirmaslik va kelgusida iqtisodiy ko‘rsatkichlarni yanada oshirish uchun mustahkam zamin yaratadi.