O'zbekistonda tashlandiq aerodromlar negizida zamonaviy sayyohlik maskanlari tashkil etiladi
O‘zbekistonda ko‘p yillar davomida foydalanilmay bo‘sh yotgan va tashlandiq holatga kelib qolgan aerodromlar hamda uchish-qo‘nish yo‘laklari to‘liq qayta tiklanadi. Bu haqda One.uz xabar beradi.
Ushbu obektlar negizida zamonaviy sayyohlik maskanlari hamda ekstremal sport turlari uchun maxsus maydonlar tashkil etilishi rejalashtirilmoqda. Mazkur tashabbus mamlakatda faol turizmni yangi bosqichga olib chiqishga qaratilgan Prezident qarori loyihasida o‘z aksini topgan.
Hukumat kichik va yengil aviatsiyani rivojlantirish orqali tadbirkorlar uchun yangi biznes yo‘nalishlarini ochish va turizm salohiyatini oshirishni maqsad qilgan. Yengil aviatsiya va ekstremal sport yo‘nalishlari Yangi tartibga ko‘ra, qayta tiklangan va obodonlashtirilgan aerodrom hududlari tadbirkorlarga uzoq muddatli ijara asosida taqdim etiladi.
Ushbu maydonlarda ekstremal turizmning ommabop turlari, jumladan, yengil samolyotlarda parvozlar uyushtirish, parashyutdan sakrash va paraplanda uchish xizmatlari yo‘lga qo‘yiladi. Bu nafaqat mahalliy aholi, balki xorijiy sayyohlar uchun ham qiziqarli yo‘nalishga aylanadi.
Shu bilan birga, aerodrom hududidagi mavjud bino va inshootlardan samarali foydalanish maqsadida u yerda soha mutaxassislarini tayyorlaydigan o‘quv markazlari tashkil etiladi. Kichik aviatsiya sohasini tartibga solishni takomillashtirish uchun Fuqaro aviatsiyasi agentligiga havo kemalarini ro‘yxatdan o‘tkazish va sertifikatlash bo‘yicha kengaytirilgan vakolatlar berilishi ko‘zda tutilgan.
Bu esa sohadagi byurokratik to‘siqlarni kamaytirishga xizmat qiladi. Tadbirkorlar uchun bojxona va soliq imtiyozlari Ekstremal va faol turizm sohasida faoliyat yuritayotgan tadbirkorlarni qo‘llab-quvvatlash maqsadida davlat tomonidan keng ko‘lamli imtiyozlar paketi taqdim etilmoqda.
Xususan, 40 ga yaqin turdagi maxsus uskunalar va texnik vositalarni O‘zbekistonga olib kirishda bojxona to‘lovlaridan to‘liq ozod etish taklif etilmoqda. Ushbu ro‘yxatga kvadrotsikllar, baggilar, avtokemperlar, gidrotsikllar, parashyutlar hamda tog‘-chang‘i sporti uchun zarur bo‘lgan anjomlar kiritilgan.
Mazkur imtiyozli rejim 2027-yilning boshidan 2030-yilning boshiga qadar amal qilishi rejalashtirilgan. Shuningdek, 2027-yildan e’tiboran faol turizm obektlaridagi infratuzilma loyihalari davlat dasturlariga kiritiladi va ularni rivojlantirish uchun budjetdan mablag‘ ajratiladi.
Bu kabi choralar mamlakatning turistik jozibadorligini oshirish bilan birga, hududlarda yangi ish o‘rinlari yaratilishiga ham zamin yaratadi.
