O‘zbekiston Respublikasi Davlat xavfsizlik xizmati xodimlari qo‘shni davlatdan noqonuniy yo‘l bilan zargarlik buyumlarini olib kirishga qaratilgan keng ko‘lamli urinishni muvaffaqiyatli to‘xtatdi. Bu haqida Upl.uz xabar berdi.
O‘tkazilgan tezkor operatsiya davomida oltindan yasalgan, haqiqiy brilant bilan bezatilgan jami 4 kilogrammdan ortiq zargarlik buyumlari aniqlanib, ushbu jinoyatga aloqador shaxs qo‘lga olindi. Voqea “Vodil avto” bojxona postida yuz berdi.
Qirg‘izistondan kelib, Farg‘ona viloyatiga yo‘l olgan 33 yoshli Andijonlik fuqaro to‘xtatilib, uning shaxsiy ko‘rikdan o‘tkazilishi natijasida kiyim ostidan 859 dona turli xil zargarlik buyumlari va bitta qo‘l soati topildi. Ekspertlar tomonidan o‘tkazilgan tahlil natijasida ushbu buyumlarning yuqori sifatli oltindan tayyorlangani va ichida haqiqiy brilantlar borligi tasdiqlandi.
Ularning sof og‘irligi 4 kilogramm 155 grammni tashkil etib, bahosi taxminan 5 milliard 213 million so‘mga teng. Surishtiruv davomida ma’lum bo‘lishicha, bu noqonuniy operatsiya ortida Andijon va Farg‘ona viloyatlaridan taxminan o‘n nafar savdogarlar turgan.
Zargarlik buyumlari Turkiyadan Qirg‘izistonga olib kelingan. Qo‘lga olingan kuryer esa 400 dollar mukofot evaziga qimmatbaho buyumlarni chegaradan O‘zbekistonga olib o‘tishi ko‘zlangan.
Mazkur holat bo‘yicha O‘zbekiston Respublikasi Jinoyat kodeksining 182-moddasi, 2-qismi “a” bandi (bojxona qonunchiligi qattiq buzilishi, ayniqsa katta miqdorda sodir etilgan) bo‘yicha jinoiy ish qo‘zg‘atilgan. Hozirda huquqni muhofaza qiluvchi organlar jinoyatga aloqador barcha shaxslarni aniqlash va ushlangan zargarlik buyumlarining egalarini topish bo‘yicha faol ish olib bormoqda.
