Buxoro viloyati ichki ishlar boshqarmasi matbuot xizmatining ma’lum qilishicha, bir necha fuqaro tomonidan tashkil etilgan giyohvand moddalar laboratoriyasi aniqlanib, ushlangan. Bu haqida Upl.uz xabar berdi.
Olingan tezkor ma’lumotlarga ko‘ra, Buxoro viloyati ichki ishlar xodimlari tomonidan Namangan viloyatida joylashgan giyohvand moddalar laboratoriyasi fosh etildi. Aniqlanishicha, Yangikurgan tumani hududidagi choyxona binosida Namangan ko‘chasida yashovchi uch nafar fuqaro sintetik giyohvand moddalar ishlab chiqarish bilan shug‘ullanayotgan edi.
Ularning laboratoriyasidan jami 7,14 kilogramm mefedron giyohvand moddalari musodara qilindi. Shuningdek, ayni tuman “Vodiy” mahallasida yashovchi va jinoyat guruhining tashkilotchisi bo‘lgan shaxsdan 3 litr suyuq holatda va 100 grammdan ortiq qattiq holatda mefedron topilib, qo‘lga olindi.
Musodara qilingan giyohvand moddalar umumiy qiymati 13 milliard so‘mni tashkil etdi. Ushbu holat bo‘yicha O‘zbekiston Respublikasi Jinoyat kodeksining 273-moddasi 4-qismi — “Giyohvand moddalarni noqonuniy ishlab chiqarish, sotib olish, saqlash va boshqa harakatlar, shuningdek ularni sotish” bo‘yicha jinoiy ish qo‘zg‘atildi.
Jinoyat ishtirokchilari 10 dan 15 yilgacha ozodlikdan mahrum etilishi mumkin. Tergov harakatlari davom etmoqda.
