Davlat xavfsizlik xizmati matbuot xizmati tomonidan ma’lum qilinishicha, bir nechta shaxslarning qonunga xilof faoliyati to‘xtatildi. Bu haqida Upl.uz xabar berdi.
Namangan viloyatining Pap tumani aholisi Telegram orqali xalqaro terror tashkilotiga oid turli kontentlarni tarqatish uchun guruh tashkil qilgan. U shuningdek, Janubiy Koreyada yashagan Farg‘ona viloyati fuqarosi bilan tanishib, xalqaro terrorchilar safiga qo‘shilish rejasini tuzgan.
Jinoyatchilar o‘z yaqin atrofidan yana ikki kishini jalb qilib, diniy ekstremizm va fanatizm g‘oyalarini faol targ‘ib qilgan hamda mamlakatimizning konstitutsiyaviy tuzumini o‘zgartirishni maqsad qilgan. Ular yashirin jamoasiga qo‘shilish uchun qo‘shnilarini va tanishlarini taklif qilgan.
Natijada, jinoyatchilar guruhi 21 kishidan iborat bo‘lgan. Mazkur holat bo‘yicha to‘rt asosiy tashkilotchiga nisbatan O‘zbekiston Respublikasi Jinoyat kodeksining “Jamoat xavfsizligi va tartibiga tahdid soluvchi materiallarni tayyorlash, saqlash, tarqatish yoki namoyish qilish” hamda “Diniy ekstremistik, separatistik, fundamentalistik yoki boshqa taqiqlangan tashkilotlarni yaratish, rahbarlik qilish yoki ularda ishtirok etish” moddalariga muvofiq jinoiy ish qo‘zg‘atildi.
Qolgan 17 shaxsga nisbatan dastlabki tergov harakatlari olib borilmoqda. Ushbu choralar mamlakatimizda xavfsizlikni ta’minlash va terrorizmga qarshi kurashish doirasida amalga oshirilmoqda.
