Toshkent shahar Ichki ishlar bosh boshqarmasi Yo‘l harakati xavfsizligi boshqarmasi matbuot xizmatida ijtimoiy tarmoqlarda tarqalgan videorolik yuzasidan izoh berildi. Bu haqida Upl.uz xabar berdi.
Ijtimoiy tarmoqlarda kichik yoshdagi bolakayning “Malibu” rusumli avtomobilni haydab yurgani aks etgan video tarqaldi. Hodisa Chilonzor tumani, Bunyodkor ko‘chasidagi savdo markazlaridan birining avtoturargohida sodir bo‘lgan.
Ushbu holat yuzasidan bolaning otasi va o‘zi Toshkent shahar Ichki ishlar bosh boshqarmasi Yo‘l harakati xavfsizligi boshqarmasiga chaqirilib, profilaktik tadbirlar o‘tkazildi va qonuniy choralar ko‘rildi. Bolaning otasiga O‘zbekiston Respublikasi Ma’muriy javobgarlik kodeksining “Bolalarni tarbiyalash va o‘qitish majburiyatlarini bajarmaslik” moddasi bo‘yicha ma’muriy bayonnoma rasmiylashtirildi.
Bu kabi holatlarning oldini olish maqsadida ota-onalarning mas’uliyatini oshirish va bolalarni xavfsizlik qoidalariga rioya qilishga o‘rgatish muhim hisoblanadi. Yo‘l harakati xavfsizligini ta’minlashda har bir fuqaroning o‘rni katta ekanligi ta’kidlandi.
