Nyu-York shahridagi BMT Bosh qarorgohida O‘zbekiston taraqqiyotiga bag‘ishlangan muhim tadbir o‘tkazildi. Bu haqda Zamin.uz xabar berdi.
Tadbirda “Yangi O‘zbekiston: Shavkat Mirziyoyev yo‘li” nomli asarning taqdimoti bo‘lib o‘tdi. Ushbu marosim xalqaro hamjamiyat e’tiborini tortdi va unda yuzga yaqin nufuzli mehmonlar, jumladan BMT rahbariyati vakillari, turli davlatlar diplomatlari, xalqaro tashkilotlar hamda ommaviy axborot vositalari xodimlari ishtirok etdi.
Taqdimot davomida ishtirokchilar kitob orqali mamlakatimizda so‘nggi yillarda amalga oshirilgan keng ko‘lamli islohotlar, ularning mazmuni va natijalari bilan yaqindan tanishdilar. Asarda siyosiy, iqtisodiy va ijtimoiy sohalardagi o‘zgarishlar, demokratik jarayonlarni chuqurlashtirish, inson huquqlarini himoya qilish, iqtisodiyotni erkinlashtirish hamda jahon hamjamiyati bilan hamkorlikni rivojlantirish kabi muhim masalalar batafsil yoritilgan.
Ma’ruzachilar ta’kidlaganidek, “Yangi O‘zbekiston” g‘oyasi nafaqat mamlakat ichki hayotida, balki mintaqaviy va xalqaro maydonda ham katta ahamiyatga ega. Ushbu yo‘nalishdagi sa’y-harakatlar davlat va jamiyatning barcha sohalarini qamrab olgan.
Ayniqsa, xalq bilan ochiq muloqot o‘rnatish, davlat idoralarining shaffofligi va hisobdorligini ta’minlash borasidagi ishlar alohida e’tirof etildi. Bu esa mamlakatimizning barqaror taraqqiyoti yo‘lida muhim qadam hisoblanadi.
