Jeki Chan Olmaotada kutib olindi

Olmaotadagi shahar aeroportida taniqli aktyor va jang san’ati ustasi Jeki Chan ko‘rildi. Bu haqda Zamin.uz xabar berdi.

Internet foydalanuvchilari uning suratlari va videolarini faol ravishda tarqatmoqda, deb xabar bermoqda Kursiv media sayti. Mahalliy manbalarning ma’lumotiga ko‘ra, aktyor Salem Entertainment media kompaniyasi vakillari tomonidan kutib olingan.

Keyinchalik kinoshunos Karim Qodirboyev Instagram sahifasida Jeki Channing Olmaotaga kelganini tasdiqladi va yaqin orada qo‘shimcha ma’lumot berilishini bildirdi. Jeki Channing asl ismi Chen Gansheng bo‘lib, u 1954-yil 7-aprelda Gonkongda tug‘ilgan.

U o‘zining akrobatik tryuklari va jang san’atini komediya uslubida ijro etishi bilan mashhur. Jeki Chan "Mast usta", "Politsiya hikoyasi", "Tig‘iz vaqt" kabi Gollivud filmlarida bosh rollarni ijro etgan.

Uning filmlari nafaqat jang san’ati muxlislarida, balki keng auditoriyada katta qiziqish uyg‘otadi. Shu sababli uning Olmaotaga tashrifi madaniy va kino sohasida katta e’tibor bilan qarshi olindi.