Kianu Rivzning o‘g‘irlangan buyumlari qaytarildi
2023 yil dekabr oyida AQSH Federal qidiruv byurosi (FQB) va Chili huquq-tartibot organlari hamkorlikda Kianu Rivzning Los-Anjelesdagi uyidan o‘g‘irlangan qimmatbaho buyumlarni aktyorga qaytarib berdi. Bu haqda Zamin.uz xabar berdi.
Ushbu buyumlar bir yil o‘tib, 2024 yil dekabr oyida Chilining Santyago shahri sharqiy qismida topildi. Shu vaqt davomida ushbu o‘g‘irlikka aloqador deb gumon qilingan shaxs ham qo‘lga olindi.
Tergov ma’lumotlariga ko‘ra, mazkur o‘g‘irlik xalqaro miqyosda faoliyat yurituvchi va hujum hamda talonchiliklarni amalga oshiruvchi "Janubiy Amerika guruhlari" deb ataluvchi jinoiy tuzilmalar tomonidan sodir etilgan. Ushbu guruhlar mamlakatlar o‘rtasida harakatlanib, jinoyatlarni amalga oshiradi.
Los-Anjeles politsiyasi boshlig‘i Jim Makdonnellning so‘zlariga ko‘ra, buyumlarning muvaffaqiyatli qaytarilishi bunday jinoiy guruhlar ta’qib qilinishining muqarrarligi haqida kuchli signal beradi. FQBning Los-Anjelesdagi bo‘limi rahbari Akil Devis esa bu ishni xalqaro hamkorlikning ajoyib namunasi sifatida baholadi.
U FQB, Chili politsiyasi va Los-Anjeles politsiyasi o‘rtasidagi muvaffaqiyatli hamkorlikni alohida ta’kidladi. Kianu Rivz esa o‘z minnatdorchiligini qo‘lyozma xat orqali bildirdi.
Aktyor AQSH va Chili huquq-tartibot organlari xodimlariga ularning fidoyiligi, professionalligi va xalqaro miqyosdagi samarali hamkorligi uchun rahmat aytdi. Ma’lum qilinishicha, o‘g‘irlik sodir etilgan vaqtda aktyor uyda bo‘lmagan.
