Marvel Kapitan Amerika haqidagi tizerni taqdim etdi

Marvel kompaniyasi "Qasoskorlar: Qiyomat kuni" nomli yangi filmining ilk tizerini taqdim etdi. Bu haqda Zamin.uz xabar berdi.

Unda Kapitan Amerika, ya’ni Stiv Rojers, asosiy qahramon sifatida tasvirlangan. Ushbu rolga yana Kris Evans qaytgani e’lon qilindi.

Tizer syujetiga ko‘ra, Kapitan Amerika avvalgi hayotiga qaytadi. U o‘zining mashhur kostyumiga nazar tashlaydi va keyin o‘g‘lini ko‘tarib oladi.

Bir necha kun avval ushbu tizerning ekran nusxasi internetga tarqalgan edi. U kinoteatrlardagi seanslar vaqtida namoyish etilgan.

Yaqin kunlarda Marvel boshqa qahramonlar uchun ham alohida tizerlarni taqdim etishi kutilmoqda. Internetda Tor haqidagi norasmiy video allaqachon paydo bo‘lgan.

Bundan tashqari, kelgusi tizer Doktor Dumga bag‘ishlanishi mumkinligi haqida mish-mishlar tarqalgan. Ushbu rolni Robert Dauni kichik ijro etishi ehtimoli ham aytilmoqda.

"Qasoskorlar: Qiyomat kuni" filmi 2026 yilning 18 dekabrida jahon bo‘ylab namoyish etilishi rejalashtirilgan. Bu yangi qismda Qasoskorlar, X-Odamlar va boshqa superqahramonlar umumiy tahdidga qarshi birlashadi.

Film tomoshabinlar orasida katta qiziqish uyg‘otishi kutilmoqda.