Shohrux Mirzo san’atdagi yo‘li va oilasi haqida so‘zladi

Aktyor Shohrux Mirzo Abduqunduzov yaqinda “Omon-omon” ko‘rsatuvida o‘zining oilaviy kelib chiqishi haqida bir qancha ma’lumotlarni ma’lum qildi. Bu haqda Zamin.uz xabar berdi.

Suhbat davomida u O‘zbekiston xalq artisti Muhammadali Abduqunduzovning katta nabirasi ekanligini oshkor qildi. Shuningdek, u ona tomonlama O‘zbekiston xalq shoiri Usmon Azimning avlodi ekanini ham ta’kidladi.

Shohrux Mirzo ushbu qarindoshlik unga katta mas’uliyat yuklashini qayd etdi. U san’at sohasida faoliyat olib borishda o‘ziga xos yondashuvni tanlaganini aytib, ko‘p seriallarda ishtirok etishni rad etishini, asosan teatr sahnalarida ijod qilishni afzal ko‘rishini bildirdi.

“Menga hech qachon qanday bo‘lishim kerakligi haqida bosim o‘tkazishmagan. Men o‘zimni erkin ijodkor sifatida his qilaman”, — deya qo‘shimcha qildi aktyor.

Ma’lumot uchun, Shohrux Mirzo joriy yilning 21-avgust kuni turmush qurdi. Uning rafiqasi Oyshaxon mashhur videobloger Obid Nasriddinov bilan birga turli videolar suratga olishda ishtirok etib keladi.