Farg‘onada 2026-yilda rassomlar festivali o‘tkaziladi
O‘zbekistonda 2026-yil may oyida rassomlar va fotograflar uchun maxsus festival tashkil etilishi rejalashtirilmoqda. Bu haqda Zamin.uz xabar berdi.
Tadbir Farg‘ona viloyatidagi Bobur shahri mezbonligida o‘tkaziladi. Ushbu festivalni o‘tkazish to‘g‘risidagi qaror Adliya vazirligi tomonidan e’lon qilindi.
Festival har ikki yilda bir marta o‘tkaziladi va unda g‘oliblar qimmatbaho sovg‘alar bilan taqdirlanadi. G‘olib ishtirokchilarga Prezident sovg‘asi sifatida Chevrolet Onix avtomobili, diplom, esdalik haykalchasi hamda pul mukofoti topshiriladi.
Festivalda qatnashishni istagan nomzodlar hujjatlarini 2026-yil 1-fevralga qadar taqdim etishlari lozim. Tashkilotchilar tomonidan anketa (rezyume), 6×9 o‘lchamdagi uchta rangli fotosurat, ish tajribasi va ilgari qatnashgan ko‘rgazmalar yoki festivallarni tasdiqlovchi hujjatlar talab qilinadi.
Bundan tashqari, nomzodlar o‘z asarlarini taqdim etish uchun kamida o‘nta fotosurat va ijod jarayonini aks ettiruvchi videomaterialni ham ilova qilishlari kerak. Tashkiliy qo‘mita 1-aprelga qadar ishtirokchilar ro‘yxatini shakllantiradi va festivalga qabul qilinganlar haqida ularga xabar beradi.
Festival ijodkorlarni qo‘llab-quvvatlash va san’at rivojiga hissa qo‘shishni maqsad qilgan.
