Bahrom Nazarov: "Harakat qildim va eshiklar ochildi"

Xonanda Bahrom Nazarov yaqinda “ChotkiTV” dasturiga bergan intervyusida san’at sohasiga kirib kelishidan avvalgi hayoti va o‘sha davrdagi muhim qarorlari haqida so‘zlab berdi. Bu haqda Zamin.uz xabar berdi.

U o‘zining hayotida qanchalik murakkab tanlovlar qarshisida turganini samimiy tarzda bayon qildi. Bahrom Nazarovning aytishicha, 2013-yillarda u Shveysariyaga ishlash uchun ketishni rejalashtirgan.

Bu qarorining sababi o‘sha vaqtdagi moliyaviy qiyinchiliklar bo‘lgan. U o‘z niyatini shunday izohlaydi: “Uy-joy qilaman, ishlab kelaman, degan niyatim bor edi.

Ikki yoshli farzandim bor edi. Oilamni boqishim kerak edi.” Safarga chiqishdan oldin u o‘z ustozi huzuriga borib, maslahat olish va duolarini olishni lozim topgan.

Ustozining javobi esa uning kelajak hayotini butunlay o‘zgartirgan. Ustozi unga shunday degan: “Bahrom, sen harakatchan, ijodkor yigitsan.

Yana bir bor harakat qilib ko‘r, bir eshikni taqillat. Balki kimdir ochib qolar.

Agar bo‘lmasa, keyin ketaverasan.” Bu maslahat Bahrom Nazarovga katta ruhiyat bag‘ishlagan. U yana bir bor harakat qilishga qaror qiladi va bu qaror uning hayotidagi burilish nuqtasi bo‘ladi.

Xonanda o‘z tajribasini shunday ifodalaydi: “Men harakat qildim va o‘xshab ketdi. Olloh eshiklarni ochdi.” Intervyu so‘ngida Bahrom Nazarov barchaga ibrat bo‘ladigan fikrlarini bildirib o‘tdi: “Kim bo‘lishidan qat’i nazar, harakat qilish va intilish kerak.

Eshikni taqillatib ko‘rish zarur. Olloh aytganidek: ‘Sen harakat qil, men beraman’.

Inson harakat qilsa, Olloh bermaslikdan hayo qiladi.” Xonandaning ushbu so‘zlari ko‘pchilik uchun ilhom va motivatsiya bo‘lishi shubhasiz.