Zayed mukofoti Armaniston, Ozarbayjon va afg‘on ayoliga berildi

2026 yilgi Zayed nomidagi insoniy birodarlik xalqaro mukofoti g‘oliblari e’lon qilindi. Bu haqda Zamin.uz xabar berdi.

Bu yil mukofot Armaniston va Ozarbayjonga, shuningdek, afg‘onistonlik inson huquqlari himoyachisi Zarka Yaftaliga topshiriladi. Bu tarixiy hodisa bo‘lib, ilk bor Kavkaz mintaqasi va Afg‘oniston vakillari ushbu mukofotga sazovor bo‘lishdi.

Hakamlar hay’ati Armaniston va Ozarbayjon o‘rtasida imzolangan tinchlik kelishuvini uzoq yillik mojarolarni yakunlash va gumanitar iztiroflarni kamaytirishga qaratilgan muhim qadam sifatida baholadi. Mukofot bosh kotibi Moxamed Abdelsalam bu kelishuv ikki xalq uchun xavfsiz kelajakni ta’minlashga xizmat qilishini ta’kidladi.

Armaniston bosh vaziri Nikol Pashinyan ushbu mukofotni hukumat va jamiyatning birgalikdagi harakatlari e’tirofi deb atadi. Ozarbayjon prezidenti Ilhom Aliyev esa xalqaro hamjamiyatning tinchlik yo‘lidagi tashabbuslarni qadrlashini butun mintaqa uchun muhim voqea sifatida baholadi.

Ikkinchi g‘olib Zarka Yaftali ayollar va bolalarning ta’lim olish huquqini himoya qilishdagi faoliyati uchun mukofotlandi. Uning sa’y-harakatlari natijasida 100 mingdan ortiq inson ta’lim resurslari va psixologik yordamdan foydalandi.

YuNISEF ijrochi direktori Ketrin Rassell Yaftalining yetakchiligini yuqori baholadi. Zarka Yaftali esa bu mukofot afg‘on ayollari uchun umid ramzi ekanini aytdi.

Mukofot g‘oliblari mustaqil xalqaro hay’at tomonidan tanlandi. Hay’at tarkibida Prezident Administratsiyasi rahbari Saida Mirziyoyeva, Yevropa Kengashining sobiq prezidenti Sharl Mishel, Afrika Ittifoqi komissiyasining sobiq raisi Mussa Faki Moxamat, YuNISEF ijrochi direktori Ketrin Rassell va boshqa nufuzli shaxslar bor.

Saida Mirziyoyeva mukofot e’lon qilinishi tinchlik va inson qadriyatlariga sadoqatni aks ettirishi, xalqaro hamjamiyatga yangi umid berishini ta’kidladi. Mukofot topshirish marosimi 2026 yil 4 fevral kuni, Xalqaro insoniy birodarlik kunida Abu-Dabidagi Asoschi memorialida bo‘lib o‘tadi.

Tadbir Toshkent vaqti bilan soat 18:00 da boshlanishi rejalashtirilgan. Ushbu mukofot Shayx Zayed bin Sulton Al Nahayonning gumanitar merosi hamda Papa Fransisk va Al-Azhar buyuk imomi Ahmad Al-Tayeb imzolagan qo‘shma hujjatdan ilhomlangan holda 2019 yilda ta’sis etilgan.

Shu kungacha turli mamlakatlardan 19 nafar laureat mukofot bilan taqdirlangan.