Yulduz Usmonovaning “Layli” qo‘shig‘i 500 ming marta tinglandi
Xonanda Yulduz Usmonova o‘zining rasmiy YouTube kanali orqali “Layli” nomli yangi qo‘shig‘ini taqdim etdi. Bu haqda Zamin.uz xabar berdi.
Ushbu tarona atigi uch kun ichida 500 ming martadan ortiq tinglanib, katta qiziqish uyg‘otishga muvaffaq bo‘ldi. Qo‘shiq ostida 500 dan ortiq iliq va samimiy izohlar qoldirilgan bo‘lib, tinglovchilar san’atkorning navbatdagi ijodiy ishini yuqori baholamoqda.
Ayniqsa, qo‘shiqning musiqasi va mazmuni ko‘pchilikka manzur bo‘lganini izohlardan anglash mumkin. “Layli” qo‘shig‘i hozircha klipsiz taqdim etilgan bo‘lsa-da, ko‘plab muxlislar ushbu taronaga videoklip ishlanishi kerakligi haqida fikr bildirishmoqda.
Tinglovchilarning bunday faol qo‘llab-quvvatlashi qo‘shiqning yanada ommalashishiga xizmat qilmoqda. Yulduz Usmonovaning navbatdagi ijod namunasi sifatida e’tirof etilayotgan “Layli” taronasi qisqa vaqt ichida o‘z o‘rnini topib, muxlislar orasida mashhurlikka erishdi.
