“Qirol sher” rejissyori Rojer Allers vafot etdi

“Disney” kompaniyasining mashhur animatsion loyihalaridan biri — “Qirol sher” multfilmini yaratishda ishtirok etgan rejissyorlardan biri Rojer Allers 76 yoshida hayotdan ko‘z yumdi. Bu haqda Zamin.uz xabar berdi.

Bu haqda uning yaqin hamkasbi va rejissyor Deyv Bossert rasmiy ma’lumot berdi. Deyv Bossert ijtimoiy tarmoqlarda qoldirgan xotirasida Allersning o‘limi uni chuqur qayg‘uga solganini ta’kidladi.

Uning so‘zlariga ko‘ra, ular yaqin vaqtgacha aloqada bo‘lib turgan, Allers esa hayotining so‘nggi kunlarida Misr bo‘ylab sayohat qilgan. Shu sababli bu yo‘qotish kutilmagan va og‘ir bo‘lib qabul qilingan.

Bossert o‘z do‘stini iste’dodli rassom, chuqur fikrlovchi ijodkor va “Disney” animatsiyasini yangi bosqichga olib chiqqan muhim shaxs sifatida esladi. Uning aytishicha, Rojer Allers “Disney”ning qayta tiklanish davrida muhim rol o‘ynagan ijodkorlardan biri bo‘lgan.

Rojer Allers rejissyor Rob Minkoff bilan birgalikda 1994 yilda “Qirol sher” multfilmini suratga olgan. Ushbu asar nafaqat studiya tarixidagi, balki jahon animatsiyasidagi eng muvaffaqiyatli loyihalardan biri sifatida tan olingan.

Multfilm jahon bo‘ylab 771 million dollar daromad keltirgan. 2019 yilda esa uning remeyk versiyasi butun dunyo bo‘ylab 1,6 milliard dollar yig‘ib, eng ko‘p daromad keltirgan filmlar qatoridan joy olgan.

Allers o‘z faoliyatida boshqa ko‘plab mashhur animatsion loyihalarda ham ishtirok etgan. Jumladan, “Aladdin”, “Suv parisi”, “Sohibjamol va mahluq”, “Ov mavsumi” hamda “Oliver va kompaniya” kabi asarlar yaratishda ham uning hissasi katta bo‘lgan.

Animatsiya olami yana bir buyuk ijodkoridan ayrildi. Rojer Allers qoldirgan boy ijodiy meros esa hali uzoq yillar davomida tomoshabinlarning qalbidan joy olishda davom etadi.