Habi Leym kompaniyasidagi ulushini 975 mln dollarga sotdi
TikTok platformasining eng mashhur blogerlaridan biri, 270 million obunachiga ega Habi Leym o‘zining “Step Distinctive Limited” kompaniyasidagi ulushining bir qismini Amerikaning “Rich Sparkle Holdings” kompaniyasiga 975 million dollarga sotdi. Bu haqda Zamin.uz xabar berdi.
Ushbu bitimning qiymati 11,7–12,7 trillion so‘m atrofida baholanmoqda (dollar kursiga qarab). Mazkur kelishuv blogerning kelajakdagi daromad modelida sezilarli o‘zgarishlar yuz berishini anglatadi.
Kelishuvga ko‘ra, xaridor tomon keyingi uch yil davomida Habi Leymning dunyo bo‘ylab daromad keltiradigan barcha yo‘nalishlariga eksklyuziv huquq oladi. Bu yo‘nalishlarga reklama, litsenziyalash, brend ostidagi mahsulotlar savdosi va boshqa monetizatsiya imkoniyatlari kiradi.
Ushbu jarayonlar yagona tizim orqali boshqarilishi rejalashtirilgan. Natijada, Habi Leymning daromadi endi alohida reklama shartnomalaridan emas, balki uning nomi asosida yaratilgan biznesning umumiy muvaffaqiyatiga bog‘liq bo‘ladi.
Bitimning yana bir diqqatga sazovor jihati shundaki, Habi Leym sun’iy intellektga asoslangan “raqamli egizak” yaratishga rozilik bergan. Ushbu raqamli model uning yuzi, ovozi va harakatlarini takrorlay oladi.
Bu “raqamli egizak” turli tillarda efirga chiqishi, kontent yaratishi va tijorat faoliyatida qatnashishi mumkin bo‘ladi. Kompaniya bu yondashuvni kontent va elektron tijoratni global miqyosda uyg‘unlashtiruvchi innovatsion model sifatida baholamoqda.
