Ulug‘bek Yo‘lchiyev duet premyerasi nega bo‘lmagani haqida so‘zladi
Ulug‘bek Yo‘lchiyev va Jasur Umirovning duet qo‘shig‘i nega premyera qilinmagani haqida savollar tug‘ildi. Bu haqda Zamin.uz xabar berdi.
“Omon-omon” dasturining navbatdagi sonida xonanda Ulug‘bek Yo‘lchiyev mehmon bo‘lib, ushbu masala yuzasidan o‘z fikrlarini bildirdi. San’atkorning so‘zlariga ko‘ra, Jasur Umirovning konsertida ular duet ijro etishgan va qo‘shiq yozib olingan.
Biroq, keyinchalik bu qo‘shiq premyera qilinmagan, hatto ayrim lavhalar ham montaj jarayonida olib tashlangan. Ushbu holat kichik tushunmovchilik sabab yuzaga kelgani aytilmoqda.
Ulug‘bek Yo‘lchiyev vaziyatni quyidagicha izohladi: “Jasur Umirov konsertida duet kuyladik, ovozlar yozildi. Keyin u mening suratimni so‘radi, yoqsa chiqaramiz dedi.
Men esa hazil tariqasida: ‘Senga yoqmay qo‘ya qolsin rasmim’, deb aytdim. Shundan keyin bu mavzuda gaplashmadik ham”.
Mazkur voqea ijtimoiy tarmoqlarda keng muhokama qilindi. Muxlislar esa ikki mashhur xonandaning hamkorligi baribir bir kun kelib rasman taqdim etilishiga umid qilishmoqda.
