Dilnoz Hakimova oilaviy hayoti va uy yumushlari haqida gapirdi
Yosh xonanda Dilnoz Hakimova YouTube platformasidagi loyihalardan birida shaxsiy hayoti, oilaviy munosabatlari hamda uydagi tartiblar haqida ochiq suhbat qurdi. Bu haqda Zamin.uz xabar berdi.
San’atkor turmush qurganidan keyin hayot tarziga jiddiy o‘zgarishlar kirgani yo‘qligini va oila qurish unga og‘irlik keltirmaganini ta’kidladi. Xonandaning tushuntirishicha, to‘ydan so‘ng alohida xonadonga ko‘chib o‘tganlari sababli kundalik ro‘zg‘or ishlari unga katta yuk bo‘lmagan.
Hozirgi kunda u asosan turmush o‘rtog‘i uchun ovqat tayyorlash bilan shug‘ullanadi, og‘ir uy yumushlarini bajarish esa majburiyat sifatida qaramaydi. Shuningdek, dam olish kunlari qaynota va qaynona xonadoniga borib, oilaviy suhbatlar qurish ular uchun odatga aylangan.
Suhbat davomida Dilnoz Hakimova hayotidagi ayrim cheklovlar haqida ham to‘xtalib o‘tdi. U tadbirlarda asosan ayollar va bolalar bilan suratga tushishini, erkaklar bilan rasmga tushmasligini turmush o‘rtog‘ining istagi bilan bog‘ladi.
Bundan tashqari, dugonalari bilan restoran yoki kafelarga borishi ham cheklanganini bildirdi. Xonandaning aytishicha, avvalroq do‘stlar bilan bemalol vaqt o‘tkazgan bo‘lsa, hozirda ko‘proq uy sharoitida uchrashishga harakat qiladi.
Ushbu holatlar tashqaridan qattiq nazoratdek ko‘rinishi mumkinligini tan olgan san’atkor, buni oilaviy kelishuv sifatida qabul qilishini aytdi. Shuningdek, kliplardagi ba’zi sahnalarda ishtirok etmasligi ham turmush o‘rtog‘ining qarori ekanini va u oilasini hurmat qilganini ta’kidladi.
Sahnadagi obraziga kelsak, Dilnoz Hakimova ayol kishining nafisligi va latofati ijodda juda muhim ekanligiga ishonadi. Uning fikricha, sahnada tabiiylikni saqlash muxlislar uchun eng ta’sirli jihatdir.
Xonanda har qanday obrazda ham o‘z chegarasini belgilab olishga va nazokatni yo‘qotmaslikka intilishini, eng asosiysi esa insonning ichki xotirjamligi va baxti ekanligini qayd etdi.
