Andijonda Zahiriddin Muhammad Bobur sharafiga muazzam me’moriy majmua quriladi
O’zbekiston zaminida boy tariximizni tiklash, jahon sivilizatsiyasi rivojiga ulkan hissa qo’shgan buyuk ajdodlarimiz xotirasini e’zozlash borasidagi bunyodkorlik ishlari yangi bosqichga ko’tarilmoqda. Bu haqda Zamin.uz xabar berdi.
Prezident Shavkat Mirziyoyev mamlakatimizning turli hududlarida amalga oshirilishi rejalashtirilgan yirik ijtimoiy va madaniy loyihalar taqdimoti bilan tanishdi. Mazkur loyihalar orasida Andijon viloyatining Bobur shahrida barpo etiladigan muazzam me’moriy majmua hamda uning markazidan joy oladigan Zahiriddin Muhammad Bobur haykali alohida ahamiyatga ega.
Ushbu yodgorlikni yaratishdan asosiy maqsad buyuk bobomizning davlatchilik tafakkuri, boy ilmiy va adabiy merosini hamda insoniyat taraqqiyotidagi beqiyos xizmatlarini yosh avlod ongiga chuqur singdirishdan iborat. Haykal loyihasini tayyorlashda tarixiy haqiqatga tayanish va yuksak badiiy mahoratga alohida e’tibor qaratilmoqda.
Davlatimiz rahbariga taqdim etilgan eskizlar shunchaki tasavvur mahsuli emas, balki o’zbek olimlarining xorijlik mutaxassislar bilan hamkorlikda olib borgan ko’p yillik izlanishlari natijasidir. Unda qadimiy miniatyuralar, nodir qo’lyozmalar va tarixiy manbalar asosida Bobur Mirzoning haqqoniy siymosi aks ettirilgan.
Shu bilan birga, Pokiston Islom Respublikasining Islomobod shahrida ham Zahiriddin Muhammad Bobur haykali qad rostlashi kutilmoqda. Prezidentimizning ushbu mamlakatga tashrifi davomida poytaxtdagi go’zal maskanlardan biriga Bobur nomi berilgan edi.
Taqdimotda mazkur xorijiy bog’da o’rnatiladigan yodgorlik loyihasi ham atroflicha ko’rib chiqildi. Davlatimiz rahbari haykallarni yaratishda Bobur siymosini nafaqat shoir, balki yirik sarkarda, qudratli saltanat asoschisi va adolatli hukmdor sifatida gavdalantirish zarurligini ta’kidladi.
Uning bukilmas irodasi va davlat boshqaruvidagi salohiyati monumentning umumiy ko’rinishida yaqqol namoyon bo’lishi lozimligi qayd etildi. Bundan tashqari, taqdimot davomida ilm-fan va infratuzilmani rivojlantirishga qaratilgan boshqa muhim masalalar ham muhokama qilindi.
Xususan, Abu Rayhon Beruniy nomidagi xalqaro maktab-internatining moddiy-texnik bazasini yaxshilash, ko’hna Buxoro shahrining sayyohlik salohiyatini oshirish hamda transport tizimini zamonaviylashtirish bo’yicha aniq vazifalar belgilab berildi. Ushbu loyihalar mamlakatimizning madaniy va iqtisodiy qudratini yanada yuksaltirishga xizmat qiladi.
