O‘zbekiston terma jamoasi 66-Xalqaro matematika olimpiadasida o‘z tarixidagi eng yuqori natijani qayd etdi. Bu haqida Zamin.uz xabar berdi.
Avstraliyada bo‘lib o‘tgan ushbu nufuzli musobaqada yosh matematiklarimiz 4 ta kumush va 1 ta bronza medalga sazovor bo‘lib, mamlakatimiz sharafini munosib himoya qildilar. Bu haqida Prezident Administratsiyasi rahbarining ta’limni isloh qilish bo‘yicha o‘rinbosari Hilola Umarova o‘zining Telegram kanalida ma’lum qildi.
G‘oliblar quyidagilar: Elbek Zohidjonov — Muhammad al-Xorazmiy nomidagi ixtisoslashtirilgan maktab, 10-sinf (kumush medal); Asadbek Boboqulov — Artel Technical School NTM, 11-sinf (kumush medal); Rasulbek G‘afforov — Muhammad al-Xorazmiy nomidagi ixtisoslashtirilgan maktab, 10-sinf (kumush medal); Behruz Elmurodov — Mirishkor tumani 21-maktab, 11-sinf (kumush medal); Ozodbek Axtamov — Muhammad al-Xorazmiy nomidagi ixtisoslashtirilgan maktab, 11-sinf (bronza medal); Umarbek Ubaydullayev — Sergeli tumani ixtisoslashtirilgan maktab, 7-sinf (Honourable Mention). Jamoa jami 5 medal — 4 kumush va 1 bronza bilan mamlakat bayrog‘ini yuksak darajada ko‘tardi.
Bu natija O‘zbekistonning xalqaro fan olimpiadalaridagi ishtirokida yangi bosqich hisoblanadi. Davlat tomonidan g‘oliblar moddiy rag‘batlantiriladi.
Kumush medal egalariga 562,5 million so‘m, bronza medal sohibiga esa 375 million so‘m miqdorida mukofot beriladi. Eslatib o‘tamiz, 2024 yildagi Xalqaro matematika olimpiadasida O‘zbekiston terma jamoasi 2 ta kumush va 3 ta bronza medal olgan edi.
Joriy yil esa kumush medallar soni ikki barobar oshdi. Bu yutuq mamlakatimiz ta’lim tizimidagi islohotlarning samarasi ekanini yana bir bor tasdiqlaydi.
Umid qilamizki, bunday muvaffaqiyatlar yoshlarni fanga, xususan aniq fanlarga yanada ko‘proq qiziqtiradi.
