O‘zbekiston va Rossiya aviatsiya sohasida hamkorlikni kengaytirish bo‘yicha muhim kelishuvga erishildi. Bu haqida Zamin.uz xabar berdi.
Ushbu kelishuvga ko‘ra, ikki davlat aviakompaniyalariga haftasiga jami 1000 dan ortiq aviareyslarni amalga oshirish imkoniyati berildi. Bu esa parvozlar sonini sezilarli darajada oshirish va yangi yo‘nalishlarni ochishga xizmat qiladi.
Joriy yilning iyul oyining oxirigacha muntazam parvozlar soni haftasiga 310 tani tashkil etadi. Toshkent va Moskva yo‘nalishida har ikki tomon aviakompaniyalari haftasiga 50 tadan reys bajarishi mumkin.
Shuningdek, Samarqand va Moskva o‘rtasida haftasiga 23 ta, Termiz va Moskva yo‘nalishida esa haftasiga 10 ta reyslar belgilanmoqda. Bundan tashqari, Toshkentdan Sankt-Peterburg, Krasnoyarsk va Sochi shaharlariga haftasiga 14 tadan reyslar amalga oshiriladi.
Rossiya aviakompaniyalari uchun esa 80 ta xalqaro aeroportdan O‘zbekistondagi barcha xalqaro aeroportlarga haftasiga 7 tadan parvoz huquqi berildi. O‘zbekiston aviakompaniyalari esa Rossiyaning 29 ta yirik aeroportida parvozlarni amalga oshirish imkoniyatiga ega bo‘ldi.
Ushbu kelishuv ikki davlat o‘rtasidagi aviatsiya aloqalarini yanada mustahkamlash va yo‘lovchilarga qulaylik yaratish maqsadida amalga oshirilmoqda. Parvozlar sonining ko‘payishi iqtisodiy va turizm sohalariga ijobiy ta’sir ko‘rsatishi kutilmoqda.
