2025 yildan ijara to‘lovlarining minimal stavkalari belgilandi

2025 yil 1 yanvardan boshlab O‘zbekistonda turar joy va noturar binolarni ijaraga berishda eng kam ijara to‘lovi miqdori belgilandi. Bu haqida Zamin.uz xabar berdi.

Ushbu me’yorlar 2025 yil davlat budjeti to‘g‘risidagi qonunda o‘z ifodasini topdi. Hukumat tomonidan joriy etilgan yangi tartib soliq yuklamalarini oshkor qilish, ijara munosabatlarini rasmiylashtirish va davlat daromadlarini tartibga solish maqsadida qabul qilindi.

Endilikda jismoniy va yuridik shaxslar ijara shartnomalarini belgilangan minimal stavkalarga muvofiq rasmiylashtirishlari shart bo‘ladi. Turar joylarni ijaraga berishda hududga qarab 1 kvadrat metr uchun oylik minimal to‘lov miqdori quyidagicha belgilandi: Toshkent shahrida 28 000 so‘m, Nukus shahri va viloyat markazlarida 13 500 so‘m, boshqa aholi punktlarida esa 5 500 so‘m.

Noturar binolarni ijara uchun esa Toshkentda 45 000 so‘mdan, Nukus va viloyat markazlarida 26 500 so‘mdan, boshqa hududlarda esa 11 000 so‘mdan kam bo‘lmagan stavka qo‘yildi. Ushbu tartiblar nafaqat ijara munosabatlarini shaffoflashtiradi, balki davlat budjetiga barqaror tushum manbaini yaratishda muhim ahamiyatga ega.

Shuningdek, ijarachilar va mulk egalari o‘rtasidagi huquqiy munosabatlarni mustahkamlashga xizmat qiladi. Ekspertlar fikricha, yangi stavkalar hududlarning iqtisodiy sharoitlari, talab va infratuzilma darajasini hisobga olgan holda aniqlangan.

Shu sababli barcha ijara beruvchilar 2025 yildan boshlab belgilangan minimal stavkalarga rioya qilgan holda shartnomalarni rasmiylashtirishlari lozim. Manba: zamin.uz