O‘zbekistonda giyohvandlarga yangi ishonch telefoni ishga tushdi
O‘zbekistonda giyohvandlik muammosiga duch kelayotgan shaxslar va ularning yaqinlariga maxfiy, aniq va bepul maslahat berish maqsadida yangi ishonch telefoni tashkil etildi. Bu haqida Zamin.uz xabar berdi.
Ushbu xizmat 7 kun, 24 soat davomida faoliyat ko‘rsatadi. Ishonch telefonining raqami +998 55 515 45 65 bo‘lib, murojaat qiluvchilar shaxsiy ma’lumotlarini oshkor qilmasdan, anonim tarzda mutaxassislardan yordam olishlari mumkin.
Mazkur loyiha aholiga narkologiya xizmatlarini yanada yaqinlashtirish, profilaktik choralarni kuchaytirish va giyohvandlik muammosiga nisbatan ijobiy munosabatni shakllantirishga qaratilgan. Telefon orqali murojaat qilganlar giyohvandlikning ilk alomatlari, unga qanday tushib qolish mumkinligi, oila a’zolaridagi shubhali o‘zgarishlar va profilaktik choralarga doir savollarga javob olishadi.
Maxfiylik tamoman ta’minlanadi, har qanday ma’lumot va suhbat sir saqlanadi. Bu xizmat nafaqat davolash, balki insonlarning hayotini saqlab qolish uchun muhim qadam hisoblanadi.
Loyihaning asosiy maqsadi jamiyatda giyohvandlik muammosini ochiq muhokama qilishga turtki berish va psixologik yordamga muhtojlarga insonparvar yondashuvni targ‘ib qilishdir. Manba: zamin.uz
