Toshkent aeroportida favqulodda mashg‘ulotlar o‘tkazildi
Toshkent viloyatida havo transporti bilan bog‘liq favqulodda vaziyatlarni bartaraf etish bo‘yicha keng ko‘lamli amaliy mashg‘ulotlar o‘tkazildi. Bu haqida Zamin.uz xabar berdi.
Ushbu tadbirda Favqulodda vaziyatlar, Mudofaa, Ichki ishlar, Milliy gvardiya, Sog‘liqni saqlash vazirliklari hamda “O‘zbekiston aeroportlari” kompaniyasi kabi bir qator davlat idoralari ishtirok etdi. Mashg‘ulotlar O‘rtachirchiq tumanidagi Mudofaa vazirligi desantchilar tayyorgarlik markazida tashkil etildi.
Amaliyot aviatsiyadagi yirik halokat ssenariysi asosida o‘tkazildi. Ssenariyga ko‘ra, yo‘lovchi samolyoti qo‘nishga yaqinlashganda boshqaruv markazi bilan aloqa uzilib qoladi.
Natijada, samolyot aeroport yaqinida qulashi va kuchli yong‘in kelib chiqishi tasvirlangan. Mashg‘ulot davomida dispetcherlar favqulodda holat to‘g‘risida aeroport avariya-qutqaruv xizmatiga xabar beradi va ular tegishli idoralarni ogohlantiradi.
Shundan so‘ng qutqaruv operatsiyasi boshlanadi. Jami 250 nafarga yaqin mutaxassis va 20 ta maxsus texnika ishtirok etdi.
Qutqaruvchilar va harbiylar yong‘inni o‘chirish, jarohatlanganlarni xavfsiz hududga evakuatsiya qilish, jabrlanganlarni saralash, birinchi tibbiy yordam ko‘rsatish hamda ularni shifoxonalarga yetkazish bo‘yicha amaliy ko‘nikmalarini sinovdan o‘tkazdilar. Shuningdek, bortdagi xavfli yuklarni xavfsiz tarzda tushirish bo‘yicha ham muvofiq harakat qilindi.
“O‘zbekiston aeroportlari” kompaniyasi ma’lumotiga ko‘ra, bunday mashg‘ulotlar yil davomida bir necha marta nafaqat aeroport ichida, balki uning atrofida ham tashkil etiladi. Bu amaliyotlar favqulodda vaziyatlarda idoralar o‘rtasidagi hamkorlik mexanizmlarini mustahkamlashga, xodimlarning tezkor va aniq qaror qabul qilish malakasini oshirishga qaratilgan.
Mashg‘ulotlar yakunida har bir bosqich tahlil qilinib, hamkorlikni yanada samarali qilish bo‘yicha tavsiyalar ishlab chiqildi. Mutaxassislarning fikricha, “Toshkent” aeroporti va unga aloqador bo‘linmalar haqiqiy favqulodda holat sodir bo‘lganda ham samarali va o‘z vaqtida harakat qila oladi.
Manba: zamin.uz
