O‘zbekistonda sog‘lom turmush tarzini rivojlantirish va ommaviy sportni targ‘ib etishga qaratilgan tizimli islohotlar davom ettirilmoqda. Bu haqida Zamin.uz xabar berdi.
Shu munosabat bilan oliy ta’lim muassasalari xodimlari o‘rtasida «Hamkorlik kubogi» nomli sport musobaqasi o‘tkazildi. Mazkur musobaqa O‘zbekiston xalqaro islomshunoslik akademiyasida bo‘lib o‘tdi.
Uning asosiy maqsadi oliy ta’lim muassasalari xodimlarini sport bilan muntazam shug‘ullanishga rag‘batlantirish va sog‘lom turmush tarziga e’tibor qaratishdan iborat edi. Musobaqada O‘zbekiston xalqaro islomshunoslik akademiyasi, Toshkent davlat yuridik universiteti, Toshkent davlat iqtisodiyot universiteti, Toshkent davlat sharqshunoslik universiteti hamda O‘zbekiston davlat san’at va madaniyat instituti xodimlari ishtirok etdi.
Tadbir «Dolzarb 90 kun» loyihasi doirasida tashkil etilib, futbol, voleybol, stol tennisi, shaxmat-shashka va kibersport turlari bo‘yicha bellashuvlar o‘tkazildi. Tadbirning ochilish marosimida O‘zbekiston Respublikasining Davlat madhiyasi yangradi.
So‘ngra O‘zbekiston xalqaro islomshunoslik akademiyasi rektori Muzaffar Kamilov ishtirokchilarga murojaat qilib, ularga muvaffaqiyat tiladi. Shuningdek, musobaqa davomida sport sohasidagi hamkorlikka katta e’tibor qaratildi.
O‘zbekiston Respublikasi Sport vazirligi, Milliy olimpiya qo‘mitasi, Milliy paralimpiya qo‘mitasi, Talabalar sporti assotsiatsiyasi, Sog‘lom turmush tarzi va fitness milliy assotsiatsiyasi hamda Davlat xoreografiya akademiyasi bilan hamkorlik kelishuvlari imzolandi. Musobaqalar do‘stona muhitda, sog‘lom raqobat asosida o‘tdi.
Futbol bo‘yicha bellashuvda uchinchi o‘rin O‘zbekiston xalqaro islomshunoslik akademiyasi jamoasiga, ikkinchi o‘rin Toshkent davlat yuridik universitetiga nasib etdi. G‘oliblik esa Toshkent davlat iqtisodiyot universiteti jamoasiga berildi.
Voleybol bo‘yicha esa g‘oliblikni O‘zbekiston xalqaro islomshunoslik akademiyasi jamoasi qo‘lga kiritdi. Umuman olganda, musobaqalar katta qiziqish va yuqori kayfiyat bilan o‘tdi.
Manba: zamin.uz
