Tijorat banklarida axborot xavfsizligi uchun yangi talablar
O‘zbekiston Respublikasi tijorat banklarining axborot xavfsizligi va kiberxavfsizligiga oid minimal talablar yangi nizom orqali belgilandi. Bu haqida Zamin.uz xabar berdi.
Ushbu nizom Adliya vazirligida davlat ro‘yxatidan o‘tkazilgan bo‘lib, banklar va ularning filiallarida axborot xavfsizligini ta’minlash maqsadida alohida xizmat tashkil etilishi shart qilib qo‘yildi. Ushbu xizmatning asosiy vazifasi bankning axborot aktivlarini himoya qilish, to‘lov ma’lumotlarining noqonuniy o‘zgartirilishini oldini olish hamda bank va uning mijozlariga zarar yetkazilishining oldini olishdan iboratdir.
Banklar o‘z ichki siyosatlarini ishlab chiqib, tasdiqlashi lozim. Shuningdek, ularning axborot tizimlarida ma’lumotlar bazasi sozlamalari to‘g‘ri va xavfsiz bo‘lishi talab etiladi.
Bu chora-tadbirlar banklarning axborot xavfsizligini mustahkamlashga, kiberhujumlarga qarshi samarali kurashishga yordam beradi. Banklar quyidagi xavf-xatarlardan himoyalanishlari zarur: ma’lumotlar bazasiga ruxsatsiz kirish, administrator va foydalanuvchilar parollarini o‘g‘irlash, tizim fayllariga noqonuniy kirish, zararli dasturlarni o‘rnatish hamda ma’lumotlar bazasi va serverlarga masofaviy hujum qilish.
Tarmoqlararo ekran qurilmalari va proksi-serverlarning elektron bayonnomalari doimiy nazorat ostida bo‘ladi. Agar tashqi hujum aniqlansa, darhol Markaziy bankga xabar beriladi.
Ushbu chora-tadbirlar mamlakat banklarida axborot xavfsizligini ta’minlash, mijozlarga xizmat ko‘rsatish sifatini oshirish va kiberxavfsizlikni kuchaytirishga xizmat qiladi. Manba: Zamin.uz
