Qoraqalpog‘istonda artezan quduqlari uchun subsidiya beriladi
Qoraqalpog‘iston va Xorazm hududlarida ehtiyojmand oilalar uchun artezan quduq qazish va suv chiqarish uskunalarini o‘rnatishga davlat tomonidan subsidiya ajratiladi. Bu haqida Zamin.uz xabar berdi.
Ushbu yangilik 2025-yil 1-iyuldan boshlab kuchga kiradi va ijtimoiy ro‘yxatda qayd etilgan muhtoj oilalar subsidiya olish huquqiga ega bo‘ladi. Davlat jami xarajatlarning 90 foizini qoplaydi, biroq bu mablag‘ 30 baravarlik bazaviy hisoblash miqdoridan oshmasligi kerak.
Hozirgi kunda 30 BHM taxminan 10 million 200 ming so‘mga teng. Yangi tizimda fuqarolarga naqd pul berish o‘rniga muammoni hal qilish uchun zarur ishlar uchun mablag‘ ajratiladi.
Bu orqali toza ichimlik suviga bo‘lgan talab samarali tarzda qondirilishi rejalashtirilmoqda. Ishlarni amalga oshiruvchi tadbirkorlar faqat maxsus reestrga kiritilgan bo‘lishi lozim.
Ular quduq qazish, nasos va filtr o‘rnatish ishlarini bajaradi. Reestr “Yagona ijtimoiy himoya tizimi” bilan uzviy bog‘langan.
Subsidiyani olish uchun bir qator shartlar mavjud. Barcha ishlar tasdiqlangan pudratchi tomonidan bajarilishi, mahallada uch tomonlama dalolatnoma tuzilishi zarur.
Ushbu hujjatda quduq qazilgani va uskuna o‘rnatilgani tasdiqlanadi hamda mahalla raisi, Qurilish va kommunal xo‘jalik vazirligi vakili hamda subsidiya oluvchi tomonidan imzolanadi. Shuningdek, suv sifati tegishli idora tomonidan ichimlikka yaroqli deb baholanishi kerak.
Fuqarolar “Inson” markazlari yoki mahalladagi ijtimoiy xodimlar orqali “Yagona ijtimoiy himoya tizimi”ga ro‘yxatdan o‘tishi lozim. Ariza tasdiqlangach, ro‘yxatdagi tadbirkor belgilangan muddatda ishni boshlashi shart.
Ba’zi hududlarda artezan suvlar shunday bosimda bo‘ladiki, nasossiz o‘z-o‘zidan yer yuzasiga chiqib, favvora hosil qilishi mumkin. Bunday hollarda uskuna o‘rnatilishi talab qilinmasligi mumkin.
Mazkur subsidiya dasturi suv ta’minotini yaxshilash va aholining sog‘lom ichimlik suvi bilan ta’minlanishini ta’minlashga qaratilgan muhim chora hisoblanadi. Manba: upl.uz
