Markaziy bankning “Mehnat bozori sharhi”ga ko‘ra, so‘nggi choraklarda O‘zbekistonda real ish haqi o‘sishi Markaziy Osiyo va Kavkaz davlatlariga nisbatan pastroq bo‘lmoqda. Bu haqida Zamin.uz xabar berdi.
2025-yilning yanvar-mart oylarida Markaziy Osiyo davlatlarida real ish haqi o‘rtacha 9,8 foizga oshgan, Kavkaz davlatlari bilan birgalikda esa bu ko‘rsatkich 9,1 foizni tashkil etgan. Agar bu farq uzoq muddat davom etsa, O‘zbekiston mehnat bozori ishtirokchilarining xarid qobiliyati pasayishi va talabning susayishi mumkin.
2025-yilning ikkinchi choragida O‘zbekistonda eng kam ish haqi 91 AQSh dollariga teng bo‘lgan. Taqqoslash uchun, Belarusda bu ko‘rsatkich 243, Ozarbayjonda 235, Mongoliyada esa 222 dollarni tashkil etadi.
Shuningdek, O‘zbekistonda yillik minimal ish haqining aholining jon boshiga to‘g‘ri keluvchi yalpi ichki mahsulotga nisbati 35 foizni tashkil qilgan. Bu raqam daromadlar taqsimotidagi tenglik darajasini ko‘rsatadi.
Mintaqadagi ba’zi davlatlarda, masalan, Qozog‘iston, Qirg‘iziston va Gruziyada bu ko‘rsatkich pastroq, boshqa mamlakatlarda esa yaqin darajada shakllangan. Manba: Uz24.
