Samarqandda chiqindidan elektr energiyasi ishlab chiqariladi
Samarqand shahrida atrof-muhitni muhofaza qilish va qayta tiklanuvchi energiya manbalarini rivojlantirish maqsadida yirik loyiha amalga oshirilmoqda. Bu haqida Zamin.uz xabar berdi.
Shaharning “Xushrav” qo‘rg‘oni hududida joylashgan “Navro‘z” mahalla fuqarolar yig‘iniga tegishli 15 gektar maydonda chiqindilarni yoqish orqali elektr energiyasi ishlab chiqaradigan zamonaviy zavod qurilmoqda. Ushbu loyiha doirasida kuniga 1,5 ming tonna chiqindi qayta ishlanib, yiliga taxminan 240 million kilovatt soat elektr energiyasi ishlab chiqarilishi ko‘zda tutilgan.
Bundan tashqari, loyiha amalga oshirilganda 150 dan 200 gacha yangi ish o‘rni yaratiladi. Loyiha O‘zbekiston Respublikasi Ekologiya vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligi hamda Xitoyning yetakchi kompaniyalari bilan imzolangan hamkorlik shartnomalari asosida amalga oshirilmoqda.
Bu tashabbus nafaqat Samarqand viloyatida, balki mamlakatning yana beshta viloyatida bosqichma-bosqich amalga oshirilishi rejalashtirilgan. 2024 yilning 24 mart kuni Prezident qarori bilan “Qattiq maishiy chiqindini yoqish orqali elektr energiyasi ishlab chiqarish investitsiya loyihalarini amalga oshirish chora-tadbirlari” qabul qilindi.
Ushbu qaror hududlarda ekologik holatni yaxshilash, chiqindilarni qayta ishlash tizimiga innovatsion texnologiyalarni joriy etish hamda yirik investitsiyalarni jalb qilishni maqsad qilgan. Samarqand viloyatidagi qurilish ishlariga Xitoyning “Shanghai SUS Environment” kompaniyasi 150 million AQSH dollari miqdorida investitsiya kiritmoqda.
Zavod tomonidan ishlab chiqarilgan elektr energiyasi 30 yil davomida kafolatlangan holda “O‘zenergosotish” aksiyadorlik jamiyatiga yetkazib beriladi. Shuningdek, chiqindilarning uzluksiz yetkazib berilishi va qayta ishlanishi uchun uzoq muddatli shartnomalar tuzilgan (manba: zamin.uz).
