O‘zbekiston transport vaziri Ilhom Mahkamov «O‘zbekiston 24» telekanaliga bergan intervyusida Toshkent Ozarbayjon va Turkmanistondan parom sotib olish imkoniyatini ko‘rib chiqayotganini ma’lum qildi. Bu haqida Zamin.uz xabar berdi.
Uning so‘zlariga ko‘ra, bu davlatlarda kema qurish zavodlari faoliyat yuritmoqda va xarid qilinadigan paromlar Kaspiy dengizi orqali yuk tashish ishlarida foydalaniladi. O‘tgan yil kuzida Vesti.az portali Toshkent va Boku parom ishlab chiqarishni yo‘lga qo‘yish niyatida ekanligini xabar qilgan edi.
Ushbu maqsad uchun 150 million dollargacha mablag‘ ajratilishi rejalashtirilgan. 2025 yilning iyul oyida Ilhom Mahkamov loyiha doirasida Turkiyadan ham sheriklar jalb etilishi mumkinligini ta’kidladi.
Transport vazirligi huzuridagi Transport rivojlanishi masalalarini o‘rganish markazi fikricha, ushbu loyiha O‘zbekiston flotining yuk tashish hajmini oshirishga xizmat qiladi. Manba: Kursiv.media.
