Yurtimizda intellektual mulk sohasini rivojlantirish va uning himoyasini kuchaytirish maqsadida yangi qonun qabul qilindi. Bu haqida Zamin.uz xabar berdi.
Ushbu qonun intellektual mulk obyektlarini ro‘yxatdan o‘tkazish jarayonlarini soddalashtirish va mulk egalari manfaatlarini kengroq himoya qilishga qaratilgan. Jumladan, mualliflik huquqi va turdosh huquqlarni buzish holatlariga nisbatan jinoyiy javobgarlik kuchaytirildi.
Endi qonunga zid ravishda asarlarni yoki ularning nusxalarini ko‘paytirish, tarqatish yoki ommaviy yetkazish holatlarida jarima yoki axloq tuzatish ishlari, shuningdek, ozodlikni cheklash yoki mahrum qilish jazolari qo‘llaniladi. Agar huquqbuzarliklar takroran sodir etilsa, yoki guruh bo‘lib, oldindan til biriktirib, xizmat mavqeidan yoki ommaviy axborot vositalaridan foydalanib amalga oshirilsa, jazo yanada kuchaytiriladi.
Bunday vaziyatlarda jarima miqdori oshiriladi va jazolar muddati uzaytiriladi. Bundan tashqari, qonunda intellektual mulk obyektlarini ekspertizadan o‘tkazish muddatlari qisqartirilib, patent bojlarini to‘lash tartibi yengillashtirildi.
Qonunga kiritilgan o‘zgartirishlar doirasida «Elektron hisoblash mashinalari uchun yaratilgan dasturlar va ma’lumotlar bazalarini huquqiy muhofaza qilish to‘g‘risida»gi hamda «Ixtirolar, foydali modellari va sanoat namunalariga oid» qonunlarga ham qo‘shimchalar kiritildi. Mutaxassislarning fikricha, ushbu qonun ijodkorlar va mualliflarning huquqlarini samarali himoya qilish, adolatli raqobat muhitini yaratish hamda innovatsion g‘oyalarni rivojlantirishga xizmat qiladi.
Shunday qilib, intellektual mulk egalari o‘z mehnatlari natijalarini qonuniy ravishda himoya qilish imkoniga ega bo‘ladi (Zamin.uz).
