Mirziyoyev Pekinda Xitoy harbiy paradida qatnashadi
O‘zbekiston Respublikasi Prezidenti Shavkat Mirziyoyev 3 sentyabr kuni Pekin shahrida Ikkinchi jahon urushining yakunlanishi va Xitoyning yapon bosqinidan ozod etilganiga 80 yil to‘lishi munosabati bilan o‘tkaziladigan harbiy paradda ishtirok etadi. Bu haqida Zamin.uz xabar berdi.
Ushbu marosimga Qozog‘iston, Qirg‘iziston, Tojikiston va Turkmaniston prezidentlari ham taklif qilingan. Shuningdek, Rossiya, Belarus, Armaniston va Ozarbayjon yetakchilari hamda 2019 yildan beri birinchi marta Shimoliy Koreya rahbari Kim Chen In ham bu tadbirda qatnashadi.
Umuman olganda, 21 nafar xorijiy davlat rahbarlari taklif etilgan. Bu harbiy parad pandemiyadan keyingi eng keng ko‘lamli tadbir bo‘lib, unda birinchi marta gipertovushli raketalar, radioelektron kurash tizimlari, yangi avlod dronlari, ZTZ-201 tanklari hamda Dunfen-31 raketa komplekslari namoyish etiladi.
Namoyishda taxminan o‘n mingga yaqin harbiy xizmatchilar, yuzdan ortiq samolyot va yuzlab zamonaviy harbiy texnika ishtirok etadi. Ushbu bayram tadbirlari ShHT sammitining davomidir.
Ma’lumot manbai: Kursiv.media.
