Ichki ishlar xodimlariga uy-joy mulk huquqi berildi
O‘zbekiston Respublikasi Vazirlar Mahkamasining 2025 yil 28 avgustdagi 543-sonli qaroriga ko‘ra, ichki ishlar organlarida uzoq yillar samarali xizmat qilgan va pensiyaga chiqqan xodimlar hamda ularning oila a’zolari uchun yangi imtiyoz joriy etildi. Bu haqida Zamin.uz xabar berdi.
Qarorga muvofiq, ilgari vaqtincha foydalanish uchun berilgan uy-joylar davlat mablag‘lari hisobidan shaxsiy mulk sifatida rasmiylashtiriladi. Bu huquq 2022 yil 4 iyulga qadar xizmat muddatini to‘liq bajargan yoki sog‘lig‘i sababli rezervga chiqarilgan ichki ishlar organlari pensionerlari uchun amal qiladi.
Shuningdek, bu imkoniyat faqat sobiq xodimlarga emas, balki ularning oila a’zolariga ham taalluqlidir. Agar oila a’zolarining nomida shaxsiy turarjoy bo‘lmasa, ular ham ushbu imtiyozdan foydalanish huquqiga ega bo‘ladi.
Bundan tashqari, vafot etgan xodimlar va ichki ishlar tizimida xizmat qilgan pensionerlarning oila a’zolari ham xonadon bilan ta’minlanadi. Uy-joylarning davlat mablag‘lari hisobidan shaxsiy mulk sifatida berilishi nafaqat moddiy yordam, balki xizmat ko‘rsatganlarga bo‘lgan e’tirofdir.
Ushbu qaror ichki ishlar xodimlari va ularning oilalarini ijtimoiy qo‘llab-quvvatlashga qaratilgan muhim huquqiy hujjat sifatida e’tirof etiladi (manba: O‘zbekiston Respublikasi Vazirlar Mahkamasi).
