O‘zbekiston mahsulotlari Xitoy bozoriga kiradi
O‘zbekiston Bosh konsulxonasi diplomatlari Guandun provinsiyasidagi yirik savdo markaziga egalik qiluvchi Guangzhou Guangbai kompaniyasi bosh menejeri Say Chjinsu bilan uchrashuv o‘tkazdi. Bu haqida Zamin.uz xabar berdi.
Uchrashuvda ikki davlat o‘rtasidagi savdo aloqalarini yangi bosqichga olib chiqish masalalari muhokama qilindi. Asosiy e’tibor O‘zbekistonda ishlab chiqarilgan mahsulotlarni targ‘ib qilish va ularni Xitoy bozoriga chiqarish uchun Made in Uzbekistan savdo do‘koni hamda milliy mahsulotlar shou-rumini tashkil etish tashabbusiga qaratildi.
Agar loyiha amalga oshsa, o‘zbek mahsulotlari to‘g‘ridan to‘g‘ri Xitoy bozoriga kirish imkoniyatiga ega bo‘ladi. Guangzhou Guangbai kompaniyasi bosh menejeri Say Chjinsu O‘zbekistonda ishlab chiqarilgan mahsulotlarning yuqori sifatga ega ekanini va bozordagi narx jihatidan raqobatbardoshligini ta’kidladi.
Shu sababli, ular Guanchjou aholisi va eksportyorlar uchun foydali bo‘lishi mumkin. Muzokaralar natijasida qishloq xo‘jaligi mahsulotlari, qayta ishlangan va qadoqlangan oziq-ovqatlar hamda milliy hunarmandchilik buyumlarini Xitoy bozoriga olib kirishda mahalliy importyorlar bilan to‘g‘ridan to‘g‘ri hamkorlik qilish bo‘yicha kelishuvga erishildi.
Guangzhou Guangbai kompaniyasi Xitoyning janubiy provinsiyalaridagi eng yirik mahsulot yetkazib beruvchilardan biri hisoblanadi. Hozirda kompaniya mamlakat bo‘ylab yuzdan ortiq savdo nuqtalariga egalik qiladi va mintaqada muhim o‘rin tutadi.
Manba: Dunyo axborot agentligi.
