Toshkentda palov narxi yil davomida oshdi

O‘zbekistonda eng mashhur milliy taomlardan biri bo‘lgan palov narxlari bo‘yicha yangi hisobot e’lon qilindi. Bu haqida Zamin.uz xabar berdi.

Statistika agentligining avgust oyidagi tahlillariga ko‘ra, palovning bir kilogrammi turli hududlarda turlicha baholangan. Poytaxt Toshkent yana bir bor eng qimmat palov narxi bilan yetakchilik qilmoqda.

Rasmiy ma’lumotlarga ko‘ra, Toshkentda bir kilogramm palovning o‘rtacha narxi 117 ming 400 so‘mni tashkil etadi. Qiziq tomoni shundaki, shu yilning fevral oyida bu narx 10 ming so‘mga arzonroq bo‘lgan.

Eng qimmat palov narxlari bo‘yicha kuchli uchlikka Toshkent viloyati (113,6 ming so‘m) va Farg‘ona viloyati (115 ming so‘m) ham kiradi. Samarqandda esa palov narxi o‘rtacha 113,4 ming so‘mga teng.

Eng arzon palov esa Qoraqalpog‘istonda sotilmoqda. Bu yerda bir kilogramm palovning o‘rtacha narxi 98 ming 600 so‘mdan oshmaydi.

Shuningdek, Andijon va Sirdaryo viloyatlarida ham palov narxlari nisbatan arzon bo‘lib, mos ravishda 105,5 ming va 105,7 ming so‘mni tashkil etadi. Boshqa viloyatlarda palov narxlari quyidagicha: Buxoroda 108,4 ming so‘m, Jizzaxda 110 ming so‘m, Qashqadaryoda 111,7 ming so‘m, Surxondaryoda 111,5 ming so‘m, Navoiyda 110 ming so‘m, Namanganda 109,4 ming so‘m va Xorazmda 107 ming so‘m atrofida.

Mutasaddilar ta’kidicha, narxlardagi farq asosan mahsulotlarning, xususan go‘sht va sabzavotlarning bozordagi narxlaridan kelib chiqadi. Shuningdek, hududlardagi iste’mol odatlari ham palov tannarxiga ta’sir ko‘rsatadi.

Shu tariqa, Toshkent palov narxlari bo‘yicha eng yuqori ko‘rsatkichga ega bo‘lsa, Qoraqalpog‘iston eng arzon palov sotiladigan hudud sifatida ajralib turadi. Hisobot tafsilotlari One.uz sayti ma’lumotlariga asoslanadi.