Sud-ekspertiza tizimida yangi tartib va texnologiyalar joriy etiladi
Prezident tomonidan sud-ekspertlik faoliyatini yanada takomillashtirish va sohada zamonaviy texnologiyalarni keng joriy etish chora-tadbirlari to‘g‘risida qaror qabul qilindi. Bu haqida Zamin.uz xabar berdi.
Ushbu qaror sud-ekspertiza tizimida muhim yangiliklarni amalga oshirishni nazarda tutadi. Qarorga muvofiq, nodavlat sud-ekspertiza tashkilotlari ixtiyoriy a’zoligiga asoslangan holda O‘zbekiston sud ekspertlari palatasi tashkil etiladi.
Bu tuzilma soha mutaxassislarini birlashtirish va ularning kasbiy obro‘sini oshirishga qaratilgan. Shuningdek, nodavlat sud ekspertlarining bilim va amaliy tayyorgarlik darajasini baholash hamda ularning noqonuniy harakatlari bilan bog‘liq holatlarni adolatli ko‘rib chiqish maqsadida Adliya vazirligi huzurida Ekspert-malaka komissiyasi faoliyati yo‘lga qo‘yiladi.
Yangi tartiblarga ko‘ra, 2025-yil 1-noyabrdan boshlab ma’muriy huquqbuzarlik ishlarida advokat so‘rovi asosida shartnoma orqali sud-ekspertiza tashkilotlarida ekspertiza o‘tkazish tizimi joriy etiladi. Bundan tashqari, 2025-yil 1-dekabrdan nodavlat sud ekspertlariga yakka tartibda sud-ekspertlik byurosini tashkil etish huquqi beriladi.
2025-yil 15-dekabrdan fuqarolar X.Sulaymonova nomidagi Respublika sud ekspertizasi markaziga «Sud-ekspert» portali orqali onlayn murojaat qilib, ekspertiza tadqiqotlarini o‘tkazish imkoniyatiga ega bo‘ladilar. Eng muhim yangiliklardan biri sifatida 2026-yil 1-yanvardan Respublika sud ekspertizasi markazi ekspertlari obyektlarni ko‘zdan kechirish jarayonida majburiy ravishda bodikamera (mobil videokamera)dan foydalanish tartibi joriy etiladi.
Ushbu islohotlar sud-ekspertiza sohasida shaffoflikni ta’minlash, fuqarolarning huquqlarini mustahkam himoya qilish hamda xizmat sifatini yangi bosqichga olib chiqishga xizmat qiladi. Manba: zamin.uz
